Зындгонд музыкант æмæ композитор Диамбегты Олегыл сæххæст 65 азы
Ирон классикон æмæ эстрадон музыкалон нырыккон аивады йæ ном зындгонд æмæ уарзон кæмæн у, нæ национ культурæйы уыцы дæснытæй иу у зындгонд композитор, музыкант, Суанты Кимы номыл национ паддзахадон оркестры солист, РЦИ-Аланийы адæмон артист Диамбегты Олег.
Сфæлдыстады йæ музыкалон æрмдзæф хæдхуызæй ирд æмæ бирæвæрсыг у. Ныр 30 азæй фылдæр нæ национ аивады архайы симфонион джаз æмæ рок музыкæйы аивады. Фыссы зарджытæ, цæттæ кæны инструменталон аранжировкæтæ. Удыхъæдæй у уæздан æмæ цæстуарзон, æргомзæрдæ, æнæхин, йæ размæ æвæрд сфæлдыстадон æмæ цардыуаджы хæстæм – бæрнон цæстæй кæсæг æмæ сæ æнæлазæй æххæстгæнæг хистæр.
Фидæны курдиатджын композитор æмæ музыкант Диамбегты Таймуразы фырт Олег райгуырд 1961 азы 23 январы Дзæуджыхъæуы. Йæ сабийы бонтæй бауарзта музыкалон аивад. Йе сфæлдыстадон фæндаг райдыдта Дзæуджыхъæуы Петр Чайковскийы номыл Сывæллæтты музыкалон скъолайæ. Ам ахуыр кодта фортепианойы цæгъдджыты хайады. Уый фæстæ бацыд Дзæуджыхъæуы Аивæдты училищæйы (ныр – Гергиты Валерийы номыл Аивæдты колледж) дирижертæ æмæ зарæггæнджыты къорды разамонæджы хайадмæ. Йæ курдиатæн ын аргъ кодтой училищæйы разамынд, йæ ахуыргæнджытæ æмæ студенттæ, фæлæ дыууæ азы фæстæ раивта æрхуы музыкалон инструменттыл цæгъдыны хайадмæ. Ахуыр кодта кларнетæй цæгъдыныл. Уыцы-иу рæстæг цыд, зындгонд композитор æмæ музыкант, УФ-йы аивæдты сгуыхт архайæг Къæбойты Николай разамынд кæмæн лæвæрдта, джазы музыкæйы уыцы факультативон ахуыртæм. Курдиатджын зæрдæргъæвд студент тырныдта музыкæйы алы жанры сусæгдзинæдтæ бындуронæй базонынмæ, дæсны цагъта саксафоныл æмæ æндæр къæбæлджын музыкалон инструменттыл. Йе сфæлдыстадон арæхстдзинад æвдыста канд училищæйы ахуырты æмæ сфæлдыстадон изæрты нæ, фæлæ ма рок-музыкæйы музыкалон къордтæ «Альбом» æмæ «Электрон»-ы дæр.
Аивæдты училищæ æнтыстджынæй каст куы фæци Олег, уæд йе сфæлдыстадон æрмдзæф ирддæрæй рабæрæг куыд музыкант æмæ композитор. Уыд нырыккон музыкæйы сфæлдыстадон иугонд «Росконцерт»-ы дæлбар музыкалон эстрадон къордты – ансамбльтæ «Арт», «Альбом» æмæ «Сиртаки»-йы.
Курдиатджын музыкант æмæ композитор Диамбегты Олегæн кæд йе концертон архайдмæ фау æрхæссæн нæ уыд, уæддæр æй бафæндыд музыкæйы уæлдæр ахуырад райсын. 1992 азы æнтыстджынæй каст фæци Краснодары культурæ æмæ аивæдты паддзахадон институты музыкалон хайад. 1993 азæй абоны онг Олег у Суанты Кимы номыл эстрадон паддзахадон оркестры солист. Ам йæ курдиат ирдæй бæрæг дары куыд музыкант, композитор, аранжировкæты автор. Иудадзыгдæр ын ис сфæлдыстадон куыст æмæ рæзтæн ног æмæ ног фадæттæ, гæнæнтæ æмæ фæндтæ. Уыдон та иумæйагæй ахадынц йæхи миддунейыл, оркестры æмæ иумæйагæй нырыккон национ музыкалон аивады рæзт æмæ æмвæзадыл.
Æппæтуæрæсеон æмæ дунеон музыкалон ерысты уæлахиздзау Диамбегты Олег уыд Цæгат Ирыстоны Тæбæхсæуты Балойы номыл Ирон академион театры концертмейстер æмæ музыкалон хайады сæргълæууæг. Зæрдæагайгæ æнкъарæнджын музыкæ ныффыста ссæдз комедион, драмон æмæ трагедион спектакльтæм. Сæ зынгонддæртæ сты Уильям Шекспиры «Ромео æмæ Джульеттæ», Хуыгаты Георы «Æххуырст фæтæг» æмæ «Хъæздыг хæдзар», Саламты Къолайы «Зæлийы чындзытæ», Айларты Асæхмæты «Ханты цагъд» æмæ «Рæстæгмæ ус»…
Куыд нæ бæстæйы, афтæ Цæгат æмæ Хуссар Ирыстоны аивадуарзджытæн зонгæ æмæ уарзон сты Оледжы фыст симфонион кадæг «Через тернии к звездам», йæхи æмæ ирон поэтты фыст æмдзæвгæтыл зарджытæ «Пройдись по селам нашим», «Дзæуджыхъæу», «Нет любви», «Слова признания», «Фæззæг», «Здравствуй, мой край», «Песня о любимом городе», «Играй, скрипач», «Арфæтæ». Сæрмагондæй йæм эстрадон оркестрæн дæр ис фыст æхсæз уацмысы. Арæх сæ фехъусæн вæййы Олегæн йæхи æмæ Суанты Кимы номыл паддзахадон эстрадон оркестры концертты, нæ республикæйы радио æмæ телеуынынадæй.
Уæрæсейы Федерацийы композиторты цæдисы уæнг, композитор Диамбегты Олег музыкалон культурæмæ ахадгæ æвæрæн кæй бахаста, уый фæдыл ын лæвæрд æрцыд РЦИ-Аланийы Парламенты Кады гæххæтт æмæ нæ республикæйы адæмон артисты кадджын ном. Зæрдиагæй архайы Культурæйы кусджыты республикон профцæдисты змæлды, Цæгат æмæ Хуссар Ирыстоны æхсæнадон царды. Йæ юбилейон бæрæгбоны фæдыл ын кæнæм зæрдиаг арфæтæ. Нæ зæрдæ йын зæгъы, царды хорзæхтæй, сфæлдыстадон удцырынæй, кæстæртæ æмæ уыдоны цоты хорздзинæдтæй алкæддæр райгонд æмæ буц куыд уа!
ГАСАНТЫ Валери
