Нæ республикæйы фæндæгтыл ивгъуыд къуыри æрцыд 100 фæндаггон-транспортон фыдбылызы. Хъыгдард дзы баййæфтой 17 адæймаджы. Арæхдæр фыдбылызтæ æрцæуынц, машинæтæ кæрæдзийы ныхмæ куы рацæуынц, уæд. Эпидемиологион уавæр Цæгат Ирыстоны нæ аивта, 18 адæймаджы фæрынчын сты коронавирусон инфекцийæ.
Ацы нымæц аппаратон æмбырды фехъусын кодта «Роспотребнадзор»-ы ра-
замонæг Тыбылты Алан æмæ бафтыдта, Ахуырад æмæ наукæйы министрадимæ кæй бæрæг кæнынц скъоладзауты æнæниздзинад.
Æмбырд амыдта республикæйы Сæргълæууæг Сергей Меняйло.
Дзуапдæттæн доклады Хицауады Сæрдары хæдивæг Томайты Ирбег фе-
хъусын кодта, Уæрæсейы Федераци æмæ Гуырдзыстоны арæнты сæрты ахизынмæ рады кæй лæууынц 2070 машинæйы. Ивгъуыд къуыри арæнты сæрты дыууæрдæм ахызт аст мин машинæйы æмæ 19 мин адæймагæй фылдæр. Ныртæккæ Арвыкомы фæндаг у гом транспорты алы хуызтæн дæр.
Нæ республикæйы фараст рæвдауæндоны æхгæд æрцыдысты карантины аххосæй. Скъоладзауты 13 проценты æмæ рæвдауæндæтты хъомылгæнинæгты 16 проценты сты рынчын, уый тыххæй аппаратон æмбырды загъта ахуырад æмæ наукæйы министр Алыбегты Эллæ. Ирыстоны историйы олимпиадæ скъоладзауты ’хсæн ацæудзæн æртыццæджы, 11 февралы. Уыимæ, скъолатæн ног 20 автобусы райсынæн бадзырд бафыстой, афтæмæй сæ нымæц 165 уыдзæн. Ныхас цыд профилон, комкоммæ та туристон нысаниуæгимæ кълæстæ гом кæныныл, ныридæгæн уал кусынц 16 ахæм къласы. Министр æхсызгонæй фехъусын кодта, ахуырадон 500 куыстуатæн элект-
ронон бюджетæй пайда кæныны фадат кæй фæзынд, уый.
Сергей Меняйлойы хъуыдымæ гæсгæ, фылдæр æргом аздахын хъæуы
ахуырадон куыстуæтты æфсæддон-патриотон хъомылады уынаффæгæнджыты куыст рапарахат кæнынмæ.
Ахæм ахуыртæ ацæуыны фадат ис федералон программæйы бындурыл.
Республикæйы Мидхъуыддæгты министрады хъусынгæнинагмæ гæсгæ, 2-8 февралы нæ регионы æрцыд 174 фыдракæнды, уыдонæй бантыст 114 раргом кæнын. Сарæх сты, æбæрæг фыдгæнджытæ сайдæй куы бадзурынц телефонæй, иу кæнæ иннæ ран рæмудзæн æрмæг ис, зæгъгæ, ахæм цаутæ. Сæрмагонд оргæнты кусджытæ æвæстиатæй бабæрæг кодтой 123 ахæм объекты, сарæзтой æппæт хъæугæ мадзæлттæ. Алы дзæнгæрæг дæр мæнг разынд.
«Межрегионгаз»-ы разамындæн Сергей Меняйло бафæдзæхста цæхæрадæтты æмбалад «Сады Шалдона»-йы фарстамæ æркæсын, уазал рæстæг цалынмæ у, уæдмæ газæй макæй цух кæнын.
Доны фарстайыл дзургæйæ, республикæйы Сæргълæууæг бафæдзæхста нымайæн прибортæ æнæкъуылымпыйæ æвæрын фæкæсинаг, бирæсывæллонджын æмæ сæрмагонд æфсæддон операцийы архайджыты бинонтæн.
Ныридæгæн уал 800 приборы сæвæрдтой «Водоканал»-ы кусджытæ.
Республикæйы æнæниздзинад хъахъхъæнынады министр Митциты Астан фехъусын кодта, ныртæккæ рынчындæтты сæхи кæй дзæбæх кæнынц 3 860 адæймаджы, «Тагъд æххуысы станцæ»-йы дохтыртæ къуыримæ рынчынтæм рацыдысты 4 465 хатты. Регионы разамонæг ын бафæдзæхста, цæмæй, льготон хостæ кæмæн æмбæлы, уыдон сæ æнæкъуылымпыйæ исой, фелсырон пункттæ æмæ амбулаторитæ æххæст уой хъæугæ медицинон кусджытæй, уæлдайдæр дæрддзæф хъæуты.
Æппæтуæрæсеон куысты бынæтты армукъа «Работа России» райдайдзæн 17 мартъийы, æмæ дзы нæ республикæ дæр хъуамæ бацархайа. Куыд æм цæттæ кæнынц, уый тыххæй фехъусын кодтой республикæйы Сæргълæууæгæн.
Аппаратон æмбырды Сергей Меняйло министрадтæ, ведомствæтæ æмæ районты разамонджытæн бахæс кодта, цæмæй сæ куыст хæрзхъæддæр уа, цæмæй нысанмæарæзт программæтæ æххæстгонд цæуой, уый тыххæй хъæуы æрвылбон кусын. Ныхас цыд фæндæгты арæзтадыл, скъолаты бындурон цалцæгыл, культурæйы аивадон къордты архайдыл, Дзæуджыхъæуы Уæлахизы парчы рацарæзты проектыл æмæ æндæр ахсджиаг фарстатыл.
Гугкаты Жаннæ
