Уæрæсейы Наукæйы боны агъоммæ Хæххон паддзахадон аграрон университеты ацыд æмбарынгæнæн экскурси республикæйы скъолаты профилон агрокълæсты ахуырдзаутæн.
Рæзгæ фæлтæр се ’ргом нырыккон мидисджын агротехнологитæм цæмæй аздахой, экскурсийæн фадæттæ саразæг адæм ууыл бацархайдтой. Ахуырдзаутæ æппæтæй раздæр бабæрæг кодтой энергетикон факультет æмæ ам проектæн фадæттæ саразæг адæймæгты раныхæстæм байхъуыстой.
Фæсивæд уæлдай райгонддæр уыдысты агрономон комплексмæ балцæй. 1991 азы кæй байгом кодтой, ахуырдзаутæ университеты уыцы оранжерей бабæрæг кодтой. Субтропикон культуртæ – апельсинтæ, мандаринтæ, лимонтæ, грейпфруттæ æмæ æндæртæ – кæнгæ уавæрты куыд зайын кæнынц, оранжерейы уæвыны рæстæг агрохими æмæ мыггагдарæн кафедрæйы ахуыргæнджытæ Хъаныхъуаты Зауырбег æмæ Кокойты Хазби скъоладзаутæн уыдæтты тыххæй бæлвырд хабæрттæ радзырдтой. Амынд зайæгойтæ оранжерейы цæмæй зайой, уый тыххæй арæзт æрцæуы кæнгæ æрдзыхъæд.
Практикон ахуырад дарддæр ацыд сæрмагонд лабораториты. Картофы ног хуызтæ куыд æрзайынц, ахуыргæнджытæ Андрей Петрукович æмæ Рæмонты Эллæ зайæгойты биотехнологийы лабораторимæ æрбацæуæг фæсивæдæн уый бацамыдтой, лабораторийы иннæ хайады та Артур Пехы разамындæй скъоладзауты базонгæ кодтой дзæбæхгæнæн кæрдæджыты ми-
ниуджытимæ.
Университеты уазджытæн инженерон æмæ технологон факультетты куысты тыххæй бæстон хабæрттæ радзырдтой. Биоинженерийы центр æмæ студентты конструкторон бюро куыд кусынц, ахуырдзаутæн уый равдыстой. Хъæууон хæдзарады домæнтæн ахадгæ микроорганизмтимæ тæнгъæдтæ куыд цæттæ кæнынц, мик-
робиологийы лабораторийы специалисттæ скъоладзаутæн уый равдыстой.
Экскурсанттæ бабæрæг кодтой университеты музей æмæ спортивон комплекс дæр. Æрыдоны районы Кировыхъæуы скъолайы хими æмæ биологийы ахуыргæнæг Хуы-
гаты Эльнарæйы ныхасмæ гæсгæ, агрокъласы ахуырдзаутæ практикон ахуырадмæ стыр æргом здахынц.
Скъолаты агрокълæстæ æмæ агроуниверситет дарддæр æмгуыст кæн-
дзысты. Скъоладзаутæ рæстæгæй-рæстæгмæ цæудзысты агроуниверситетмæ практикон ахуырады архайынмæ æмæ ахуыргæнджыты лекцитæм хъусынмæ. Нырыккон аграрон къабазы парахат фадæттæ фенгæйæ, ахуырдзаутæ фидæны дæсныйад цæмæй биноныг равзарой, скъолатæ æмæ университеты ‘хсæн æмгуыстад уымæн ахъаз кæны.
РЦИ-Аланийы
Ахуырад æмæ
наукæйы министрады
пресс-службæ
