Дзæуджыхъæуы цы кадджын æмбырд сарæзтæуыд, уым хыгъд æрцыдысты скъоладзауты æрвылазон республикон конкурс «Наукæмæ къæпхæн»-ы кæронбæттæн бæрæггæнæнтæ.
Республикæйы Ахуырад æмæ наукæйы министрады минæвар куыд фæбæрæг кодта, афтæмæй «Наукæмæ къæпхæн» ныр арæзт цæуы 20 азæй фылдæр. Конкурсы сæйрагдæр нысан у скъоладзауты наукон-иртасæн æмæ сфæлдыстадон куыстмæ æмхиц кæнын, сæ цымыдисагдæр проекттæ сын рæгъмæ хæссын. Ахуырад æмæ хъомылады хъуыддаджы конкурсы ахадындзинад зынгæ кæй у, уыцы æууæл хынцгæйæ, «Наукæмæ къæпхæн» ныр сси национ проект «Фæсивæд æмæ сывæллæттæ»-йы дæлпрограммæтæй иу.
Конкурсы республикон кæронбæттæнмæ сæ нау-кон-иртасæн æмæ сфæлдыстадон докладтæ æмæ æндæр проекттæ бавдыстой Дзæуджыхъæу æмæ æппæт районтæй 350
ахуырдзауы. Уыдоны арæхстдзинадæн аргъгæнæг уыдис дæсны
ахуыргæнджытæ æмæ иннæ экспертты къорд.
Жюрийы уынаффæйæ фыццаг, дыккаг æмæ æртыккаг къæпхæны дипломтæ алы номинациты саккаг кодтой хуыздæр куыстыты автортæн. Æмткæй райсгæйæ, дипломтæ æмæ жюрийы сæрмагонд призтæ сæмбæлдысты конкурсы кæронбæттæны 180 архайæгыл. Зæгъæм, Аланæ Ершова хуыздæрты номхыгъды уыд декоративон аивады номинацийы, Плиты Миланæ – математикæйы, Хъараты Светланæ – культурологийы æмæ афтæ дарддæр.
Æнтыстджындæрæй сæхи равдыстой ахуырадон центр «Вершина», сфæл-
дыстадон æрмадз «Курдиаты цæхæр» æмæ иннæ скъолаты хъомылгæнинæгтæ.
Скъоладзауты ерысы уæлахиздзаутæ æмæ æппæт архайджытæн дæр арфæтæ ракодтой Цæгат Ирыстоны ахуырад æмæ наукæйы министр Алыбегты Эллæ æмæ æмбырды иннæ кадджын уазджытæ.
Фæлæ ууыл ахуырадон ерыс нæ ахицæн. «Наукæмæ къæпхæн»-ы уæлахиздзаутæ – 30 хуыздæр иртасæн куысты автортæ архайдзысты федералон конкурс «Уæрæсейы ныфсытæ»-йы кæронбæттæны. Уый уыдзæн Мæскуыйы 3-5 мартъийы…
Дмитрий АСТАХОВ
