Дзæуджыхъæуы, Чапаевы æмæ Калинины уынгтæ цы хид иу кæны, уый бындурон цалцæгæн нысангонд цæуы 2 миллиард сомæй фылдæр. Уый тыххæй фехъусын кодта РЦИ-Аланийы Фæндаггон хæдзарады комитеты пресс-службæ.
Комитеты минæвары ныхасмæ гæсгæ, ацы хид, стæй фæндаггон инфраструктурæйы иннæ ахсджиаг объектты нывылады хъуыддаджы агентад «Росавтодор» æмæ иннæ федералон профилон ведомствæтæ алкæддæр рæдау æххуыс бакæнынц республикæйæн.
«Чапаевы хид ныридæгæн лæвæрд æрцыд республикон исбонадмæ. Хиды рацарæзтимæ бастæй, æрæджы сбæлвырд кодтам, объекты цалцæгæн хъæугæ проектон-сметон документаци чи бацæттæ кæндзæн, уыцы куыстуат. Уыимæ, æмбæлгæ гæххæттытæ паддзахадон экспертизæйы хатдзæгимæ хъуамæ цæттæ уой июны мæймæ. Уый фæстæ æвзæрст æрцæудзæн хиды бындурон рацарæзтыл бæрнон подрядчик. Рагагъоммæ куыд нысангонд цæуы, афтæмæй объекты бындурон цалцæгæн 2027 æмæ 2028 азты лæвæрд уыдзæн 2,2 миллиард сомы бæрц», – радзырдта комитеты минæвар.
Цалцæггæнæн куыстыты райдайæны агъоммæ та уал бæстондæр цæстдард уыдзæн хиды техникон уавæр æмæ бæлццæтты æдасдзинадмæ. Хъуыддаг уый мидæг ис, æмæ хиды быцæутæ иуцалдæр раны афаз сты. Ныр специа-листты сбæлвырд кæнын хъæуы рæстæгмæ техникон мадзæлттæ, цæмæй быцæуты уавæр цауддæр ма фæуа.
Дмитрий АСТАХОВ
