Ацы аз нæ республикæйы 500 студентæй фылдæр арæзтадон къордты рæнхъы архайдзысты горæт Северскы атомон станцæйы арæзтады, сывæллæтты æппæтуæрæсеон центртæ «Орленок» æмæ «Смена»-йы, стæй нæхи санаторитæ «Тæмискъ» æмæ «Осетия»-йы раздзогтæй. Уымæй уæлдай, «Гранд Сервис Экспресс»-ы кусдзысты проводниктæй, ирыстойнаг фæсивæдмæ æнхъæлмæ кæсынц «Норильскникельремонт» æмæ «ДТК-Ямал»-ы цалцæггæнæн куыстытæм æмæ нæхи республикæйы арæзтадон объектты.
Хъазуатон фæллой, æппæты нырыккондæр технологитимæ зонгæдзинад, фæлтæрддзинад райсын, ног зонгæтæ æмæ æмбæлттæ скæнын – ацы æппæт хорздзинæдтæй фæхайджын уыдзысты æрыгон чызджытæ æмæ лæппутæ, йæ студентон цард арæзтадон къордтимæ чи сбаста, уыдон.
– Ирыстоны сæрæн фæсивæд, сæ хистæрты кад æмæ традицитæ дарддæр хæсгæйæ, аккаг хуызы æвдисдзысты нæ республикæ æппæтуæрæсеон арæзтæдты – ацы ныхæстимæ Цæгат Кавказы хæххон-металлургон институты байгом кодтой Уæрæсейы арæзтадон къордты бон. Райхъуыстысты Уæрæсейы Федераци æмæ Цæгат Ирыстоны гимнтæ.
Нæ республикæйы Сæргълæууæг Сергей Меняйло арæх æмбæлы фæсивæдимæ. Студенттимæ фæдзуры нæ регионы рæзтыл, ахуырад æмæ фæллойы фарстатыл. Æмæ та ныр дæр æхсызгонæй фембæлд студентты къордты активимæ.
– Нæ зынаргъ чызджытæ æмæ лæппутæ, ныфсджын къахдзæфтæй цæут уæ равзæрст фæндагыл! Æнæ рæдигæ нæ вæййы уæлахиз, афтæмæй исæм фæлтæрддзинад, кæнæм тыхджындæр. Абоны бæрæгбон иу кæны бирæ фæлтæртæ – ахуырæй уæгъд рæстæг чи æххуыс кодта заводтæ æмæ гидроэлектростанцæтæ аразынмæ, чи куыста зæрæстон зæххыты, афтæмæй нæ бæстæйы рæсугъд фидæнмæ йе ‘вæрæн чи хаста алы азты, уыдоны. Абон дæр уыцы хорз хъуыддаг нæ бамынæг. Уæрæсейы Президент загъта, нæ бæстæ тыхджын у йæ бирæнацион адæмты иудзинадæй æмæ хæлардзинадæй.
Æнæзивæгæй цæут алы рæттæм, цæмæй фенат, базонат, бадис кæнат. Цы дуар нæ бахойай, уый нæ байгом уыдзæнис. Абон сымахыл кусы рæстæг, æмæ дзы æххæстæй спайда кæнут. Æрыгон бонтæ тагъд атæхынц, нæй сæ раздахæн. Хъуыды кæнут уæ алы къахдзæфыл дæр, цæмæй уæ архайдæй сæрыстыр уой ныййарджытæ. Ма рох кæнут – хистæртæ уын алывæрсыг æххуыс сты, хæдзары уæм æнхъæлмæ кæсынц. Ацы царды бахæлæг кæнæн ис æрыгондзинадмæ, æмæ уын цæстуарзонæй зæгъын, амондимæ аразут уæ цардвæндаг, – фыд йæ фыртæн цæстуарзонæй куыд дзура, афтæ фæсивæдимæ ныхас кодта Сергей Меняйло. Фæстæдæр, арæзтадон къордты активондæрæй чи архайдта, уыцы студенттæ æмæ сæ разамонджытæн раттой Цæгат Ирыстон-Аланийы Сæргълæууæджы Арфæйы фыстæджытæ, уыдонимæ – Хетæгкаты Олег, Кокойты Хъазыбег, Ярослав Устинов, Хъантемыр Сруков æмæ иннæтæ.
Хæххон-металлургон институты ректор Хъамболты Дзамболат, студент уæвгæйæ, архайдта Прибалтикæйы атомон станцæйы арæзтады. Йæ ныхасмæ гæсгæ, институтæн æнгом бастдзинæдтæ ис нæ бæстæйы бирæ егъау куыстуæттимæ, æмæ сæ нымæц фылдæр кæндзæнис.
– Фыццаг арæзтадон къордтæ 60-æм азты куы фæзындысты мах институты, уæдæй абонмæ уыцы змæлд нæ бамынæг. Фæсивæды хуыздæр минæвæрттæ аккаг куыст хорз мыздимæ ссарынц, уый æхсызгон у, – загъта ректор.
Бæрæгбоны арфæтæ фæсивæдæн ракодта Норильскникельремонт»-ы генералон директоры хæдивæг Александр Астахов.
– Тызмæг у æрдз Норильскы. Уазал нæм бирæ рæстæг хæссы, сæрды мæйтæ та цыбыр сты. Нæ заводтæ, фабрикæтæ уыцы рæстæг цалцæг кæнынмæ февналæм. Кусæг къухтæ нæ фаг кæны, æмæ нын стыр æххуыс вæййынц студентты къордтæ. Ирыстойнаг фæзминаг фæсивæдмæ æнхъæлмæ кæсæм кæддæриддæр. Рацæут нæм ног зонындзинæдтæм, хæлардзинады фæдыл, – загъта А.Астахов æмæ арфæ ракодта Ахуырады министрад æмæ институты разамындæн сæ æмгуыстады тыххæй.
Сыбыры æмæ Кавказы федералон зылдты Уæрæсейы студентты къордты куратор Маргарита Барсукова куыд фæнысан кодта, афтæмæй, ахæм къордты æххуысæй 54 мин студенты райстой уæлæмхасæн кусæг дæсныйæдтæ.
– Мах арæзтам космодром, олимпиаг объект, фæндæгтæ æмæ хидтæ. Фæллой царды бындур кæй у, уый ныхæстæй нæ, фæлæ хъуыддагæй æвдисынц ацы фæсивæд. Цæгат Ирыстоны разамонджытæ рагæй дæр стыр æргом здахынц студентты арæзтадон къордты архайдмæ, – загъта М.Барсукова, æмæ ныфс бавæрдта алывæрсыг æххуысæй.
Гугкаты Жаннæ
