Æнæмæнг æххæстгæнинаг медицинон фæдзæхстады полисмæ гæсгæ, дæндæгты дохтыры æххуысы системæйы райрæзтмæ уæлдай фылдæр æргом кæй здахынц, уымæн æвдисæн у, бындурон цалцæггæнæн куыстыты фæстæ Дзæуджыхъæуы аивгонд æрцæуæг фыццæгæм поликлиникæйы дæндæгты хайад.
Ныр ам æппæт кусæнуæттæ ифтонггонд сты нырыккон кусæнгæрзтæй, боны фыццаг æмбисы чи кусы, уыцы рынчынтæн дæр дохтырмæ æрбацæуыны фадат цæмæй уа, медикты куысты фæтк арæзт у ахæм уагæй. Дæндæгты хайады дохтыртæм æрбацæуæг адæмæн æппæтвæрсыг лæггæдтæ кæнынц. Адæймагæн ис амынд хайадмæ æнæмæнг æххæстгæнинаг медицинон фæдзæхстады полисмæ гæсгæ æрбацæуыны бар дæр.
– Боны фыццаг æмбисы кусгæ кæй кæнын, уый нымайгæйæ, поликлиникæйы дæндæгты ацы хайадмæ мæхи дзæбæх кæнынмæ æрбацæуын фæссихор. Ам кусынц дæсны, фæлтæрдджын специалисттæ. Бынæттон медиктæ æххуысы фæдыл сæм бахатæг адæймаджы æппæт фæндæттæ банымайынц, – зæгъы дзæуджыхъæуккаг Елизавета Колодей.
Дæндæгты хайады коллектив æппæтæй сæрыстырдæр кæмæй у, чысыл рентгенаппарат банымайæн ис ахæм ифтонггарзыл. Нырма уал ахæм ифтонггæрзтæ ис æрмæст ам æмæ Дзæуджыхъæуы æвдæм поликлиникæйы.
– Чысыл физиографы æххуысæй хæрзгыццыл радиацион тындæттынадимæ алы дæндаджы хицæн къам сисæм. Кæй дæндæгты къамтæ исæм, уыцы сылгоймаг кæд æнхъæлцау у, уæд ыл сæрмагонд хъахъхъæнæг уæлæдарæс скæнæм. Физиограф алы дæндаджы къам дæр сисы, – зæгъы медицинон хо-рентгенолог Анико Гусева.
– Нæ республикæйы паддзахадон поликлиникæты чи ис, адæм æнæмæнг æххæстгæнинаг медицинон фæдзæхстады полисты фæрцы дæндæгты уыцы хайæдты æххуысæй парахатæй пайда кæнынц. Канд хъомыл адæмы нæ, фæлæ сывæллæтты дæндæгтæ дæр дзæбæх кæнæм. Нырыккон кусæнгæрзтæй ифтонггонд поликлиникæты кусынц дæсны специалисттæ. Нæ поликлиникæтæ ифтонггонд кæмæй сты, уыцы кусæнгæрзтæ хицæн адæймæгты клиникæты æвæрд кусæнгæрзтæй цауддæр не сты, – зæгъы нæ республикæйы æнæниздзинад хъахъхъæнынады министр Митциты Астан.
Ацы азæй фæстæмæ хæстон цауты архайæг ветерантæн æнæмæнг æххæстгæнинаг медицинон фæдзæхстады фæткмæ гæсгæ кæнгæ дæндæгтæ дæр æвæрдзысты.
Коцты Элианорæ
