Æппæт уæрæсейаг регионты куыд у, афтæ Цæгат Ирыстоны дæр бынæттон адæм сæрмагонд æфсæддон операцийы архайджытæн лæвæрттæ цæттæ кæнынц.
Политикон парти «Иугонд Уæрæсе»-йы хæрзаудæн акци «Хъарм – хъæбатырæн» æххæст кæнгæйæ, æрвылбон Уæллаг Бирæгъзæнджы администрацийы бæстыхаймæ æрбацæуæг бынæттон сылгоймæгтæ сæрмагонд операцийы архайджытæн тæбынæй хъарм носкитæ бийынц.
– Ме ’мхъæуккæгты хуызæн сæрмагонд операцийы архайджытæн баххуыс кæныны фæнд скодтон. Не ’фсæддонтæ нæ узæлд цæмæй хатой, уый мæ фæнды. Æфсæддон операцийы тæлммæ кæй æрвитæм, нæ уыцы чысыл æххуысæн стыр ахадын-дзинад кæй ис, уый мæ уырны. Нæ лæппутæ ацы фæсмын носкитæ хæсты быдыры нæ, фæлæ ам, нæхимæ, цæмæй рæвдздæр дарын райдайой, уый сын мæ зæрдæ зæгъы, – загъта Гæбуты Любæ.
Ныридæгæн бархионтæ хъарм носкиты дæсгай фæлыстытæ сбыдтой (бийынæн æрмæг раттынц амынд партийы минæвæрттæ). Хъарм дарæс æмбырд кæнынц партион проект «Хистæр фæлтæр» æмæ хæрзаудæн акци «Хъарм – хъæбатырæн»-мæ гæсгæ.
– Хæсты тæлммæ кæй æрвитæм, уыцы гуманитарон æххуысæн ис стыр ахадындзинад. Хæрзаудæн акцитæ дзурæг сты не ’хсæнады иудзинадыл. Адæм сæ фадæттæм гæсгæ не ’фсæддонтæн æххуыс кæнынц. Дыууын æртыккæгæм февралы агъоммæ гуманитарон æххуыс хæсты тæлммæ арвыстам, – зæгъы нæ республикæйы Парламенты депутат Цæгæраты Руслан.
Æфсæддонтæн нæ регионы районты кæй цæттæ кæнынц, уыцы гуманитарон æххуысмæ хауынц адæймагæн хъæугæдæр дзаумæттæ, хъарм уæлæдарæс æмæ ныфсдæттæн ныхæстимæ фыстæджытæ.
Вадим Ганжа
