Дзæуджыхъæуы бынæттон хиуынаффæйады администрацийы цы кадджын æмбырд сарæзтæуыд, уым хыгъд æрцыдысты 2026 азы хуыздæр педагогон кусджыты сбæлвырд кæныны горæтаг конкурсы бæрæггæнæнтæ.
Профессион дæсндзинады ерысы æппæт архайджытæн дæр арфæ ракодта горæты администрацийы сæргълæууæг Милдзыхты Вячеслав. Уый скъолаты ахуыргæнджытæ æмæ рæвдауæндæтты хъомылгæнджытæн бузныг загъта се ‘вæллайгæ куысты, профессион рæзты фæндагыл ног æнтыстытæм тырнындзинады тыххæй.
«Ахуыргæнæг хуымæтæджы дæсныйад нæу, уый адæймагæй домы равзæрст куыстыл æгæрон æнувыд уæвын, рæзгæ фæлтæрмæ сыгъдæг уарзондзинад æвдисын. Сымах уæ хъомылгæнинæгтæн æрмæст зонындзинæдтæ нæ дæттут, фæлæ сын сæ удты рæбыны фидар кæнут адæймаджы хуыздæр æмæ рæсугъддæр ми-
ниуджытæ. Арфæ уын кæнын уæ сыгъдæгзæрдæ фæллойы тыххæй», – йæ раныхасы бафиппайдта Милдзыхы-фырт.
Уый фæстæ сценæйæ фехъусын кодтой профессион дæсныдзинады ерысы хуыздæрты нæмттæ. Афтæ, кадджын ном «Азы ахуыргæнæг» лæвæрд æрцыд Дзæу-
джыхъæуы 34-æм скъолайы химийы ахуыргæнæг Гаянэ Аванесянæн. Номинаци «Азы хъомылгæнæг»-ы конкурсы жюрийы уынаффæйæ æвзæрст æрцыдысты дыууæ уæлахиздзауы: Гаглойты Кристинæ (65-æм рæвдауæндоны минæвар) æмæ Ольга Вертопрахова (96-æм рæвдауæндоны минæвар).
Конкурсы сæрмагонд номинаци «Педагогикæйы цæджындзтæ»-йы хæрзиуджытæ саккаг кодтой профессион дæсныдзинады ерысы архайæг нæлгоймæгтæн – Саукуыйты Маратæн, Сæлбиты Аслæнбегæн, Левон Ерицян æмæ Влад Казаковæн. Ацы номинацийы уæлахиздзаутæн сæ дипломтæ ратта горæты ахуырады управленийы разамонæг Тотойты Наталья.
Ерысы архайæг ахуыргæнджытæ æмæ хъомылгæнджытæн арфæ ракодтой Дзæуджы-
хъæуы Минæвæртты æмбырды сæрдар Таболты Сергей æмæ иннæ бæрнон кусджытæ дæр.
Уый тыххæй фехъусын кодта Цæгат Ирыстоны сæйраг горæты админис-
трацийы пресс-службæ.
Нæ уацхæссæг
