Царды йæ бынат чи ссары, уый амондджын вæййы. Йæ куыстæй, йæ арæхстдзинадæй рæзгæ фæлтæрæн зонд чи амоны, рæдауæй сын йæ уды хъарм чи дæтты, наукæйы рæсугъддзинад раргом кæныныл чи архайы, уый у ахуыргæнæг.
Дзæуджыхъæуы 30-æм скъолайы математикæйы ахуыргæнæг Хъараты Сильвæйы педагогон курдиаты фæрцы «наукæты паддзах» математикæ йæ ахуырдзаутæй бирæтæн сси скъолайы предметтæй æппæты уарзондæр.
Сильвæ ахуыргæнæг кæй суыдзæн, уый дызæрдыггаг нæ уыдис. Математикæ æмæ физикæ йæ зæрдæйы арф бынат æрцахстой, йæхæдæг ма скъоладзау куы уыдис, уæд.
Æнæзæгъгæ нæй, Сильвæ кæй у педагогон династийы уæнг. Сæ бинонты фæллойадон рæстæг иумæйагæй хæццæ кæны 300 азмæ!
Йæ фыд, Хъараты Андрей, рабфакы фæстæ 1939 азы кусын райдыдта Цыколайы скъолайы. Фыдыбæстæйы Стыр хæсты архайæг хъæбатырæй хæцыд цыфыддæр знаджы ныхмæ, уæззау цæфтæ фæцис. Схорзæхджын æй кодтой Фыдыбæстæйы Стыр хæсты æмæ «Кады намыс»-ы ордентæй, майдан «Ирыстоны Намысæн»-æй. Уæрæсейы адæмон ахуырады отличник, Цæгат Ирыстоны сгуыхт ахуыргæнæг 55 азы бакуыста хъæууон скъолайы.
Йæ цардæмбал Охъазты Ольгæ та уыдис райдайæн кълæсты ахуыргæнæг. Сæ ныййарджыты къахвæдтыл ацыдысты Андрей æмæ Ольгæйы цыппар чызджы æмæ лæппу. Диссаг куыд нæ уыдис уый цыколайæгты ‘хсæн, бирæтæ дæнцæгæн хастой Хъараты бинонты. Людмилæ, Сильвæ, Антонинæ, Дженни æмæ сæ иунæг æфсымæр Валери – иууылдæр райстой уæлдæр ахуырад, абоны онг сты ахуыргæнджытæ, хъомылгæнджытæ. Сæ иузæрдион куысты фæдыл сæ алкæмæ дæр ис хæрзиуджытæ, кады нысантæ. Хистæртæ сын цы фарн æмæ хорз æгъдæуттæ ныууагътой, уыдон дарддæр хæццæ кæнынц сæ кæстæртæ æмæ уыдоны хъæбултæ.
Ахуырмæ зæрдæргъæвд чызг Хъараты Сильвæ æнтыстджынæй каст фæцис скъола, уый фæстæ та – Цæгат Ирыстоны Паддзахадон университеты физикон-математикон факультет.
Æрыгон ахуыргæнæг йæ куысты фыццаг къахдзæфтæ акодта Къостайыхъæуы астæуккаг скъолайы. Абон дæр хорз хъуыды кæны, куыд æхсызгонæй йыл сæмбæлдысты скъолайы кусджытæ, сæ сæргъы – директор Еналдыты Инал, афтæмæй.
Æнцон кæмæн вæййы райдайæнты. Цалынмæ йæ куыстыл нæ фæцалх, уæдмæ-иу, тетрæдты бæрæггæнæнтæ æвæргæйæ, бирæ æнæхуыссæг æхсæвтæ арвыста.
Фæстæдæр та кусын райдыдта Дзæуджыхъæуы 30-æм скъолайы æмæ йыл абоны онг йæ зæрдæ нæ сивта.
– Никуы ницæуыл уыдтæн фæсмойнаг, кæддæриддæр æхсызгонæй цыдтæн æмæ цæуын мæ куыстмæ, ам – мæ уарзон æмкусджытæ, мæ сывæллæттæ, нæ хъарм хæдзар. Ныртæккæ хорз ахуыр кæнынæн ис æппæт гæнæнтæ, уæлдайдæр та мах скъолайы. Педагогон коллектив æмæ йæ ахуырдзауты æнтыстдзинæдтæй скъола нымад у республикæйы раззагдæртæй иуыл, – зæгъы Сильвæ.
Уыцы хорздзинадмæ ныр æнусы ’рдæджы бæрц, стыр æвæрæн хæссы йæхæдæг дæр. Олимпиадæтæ æмæ ерысты архайгæйæ, йæ хъомылгæнинæгтæ иннæ скъола-
дзауты ’хсæн раззагдæр бынæттæ райсынц.
Хъæздыг тыллæг æрзад Сильвæйы хъомыладон хуымы. Йæ рауагъдонтæй бирæтæ ацыдысты сæ уарзон ахуыргæнæджы къахвæдтыл, систы хорз дохтыртæ, инженертæ, спорт æмæ аивады дæснытæ. Уыдонимæ – Мæскуыйы Авиацион институты студент Давид Арсеньев, математикæйы ахуыргæнæг Мæргъиты Мэри, зæрдæйы дохтыр Хъаирты Мæдинæ æмæ иннæтæ. Уый дын ахуыргæнæджы курдиат æмæ арæхстдзинад!
Йæ бирæ азты хорз куысты фæдыл педагогон фæллойы ветеранмæ ис Кады гæххæттытæ. Æппæты зынаргъдæр хæрзиуæгыл та нымайы йæ бирæ ахуырдзаутимæ æхсызгон фембæлд.
– Алцыдæр фæлтæрддзинадимæ кæй æрцæуы, уый хъуамæ зона æрыгон
ахуыргæнæг æмæ йæхиуыл куса. Архайа сывæллæтты миддуне бамбарыныл, семæ иумæйаг æвзаг ссарыныл, арф зонындзинæдтæ сын раттыныл, – зæгъы фæлтæрдджын ахуыргæнæг.
Хъараты Сильвæйæн ис хорз кæстæртæ Зæлинæ æмæ Замирæ, цин кæны уыдоны хъæбултыл. Мæскуыйы Технологон университеты ахуыр кæны Сæрмæт, Марат æмæ Беллæ та нырма скъоладзаутæ сты.
Уалдзæгимæ нæм æрцæуы рæсугъд бæрæгбон — 8 Мартъи. Амондæй алы сылгоймаг дæр хайджын уæд. Нæ кæстæртæн сæ сабидуг амондджын уæд.
Гугкаты Жаннæ
къам систа
Татьяна Шеходанова
