Цæгат Ирыстоны Хицауады, Цæрæнуатон-коммуналон хæдзарады, артаг æмæ энергетикæйы министрад æмæ парти «Иугонд Уæрæсе»-йы регионалон хайады æнгом æмгуыстады фæрцы республикæйы ахадгæ хуызы æххæстгонд цæуы уæлæмхасæн газификацийы нысанмæарæзт программæ.
Регионы уыцы куыстыл комкоммæ бæрнон у компани «Газпром газораспределение Владикавказ». Рæстæг куыд æвдисы, афтæмæй куыстуат прог-раммæйы уæгæвæрдтæ афойнадыл æххæст кæны. Уымæн æвдисæн ахæм нымæцтæ: 2021 азæй нырмæ (ома, программæ йæ тыхы куы бацыд) æрвгъуыз артаджы хæтæлтæм баиу кæныны фæдыл фæлхасгæнджытæ компанимæ балæвæрдтой 3,8 мин курдиатæй фылдæр, уыдонæй уал 3,5 мин участочы арæнтæм хæтæлтæ бауагътой, 2,7 мин хæдзары цæрджытæ та ныридæгæн райдыдтой пайда кæнын газы артагæй. Иннæ курдиæттыл дарддæр куыст цæуы.
Уыимæ, зындгонд куыд у, афтæмæй 2024 азы программæйы уагæвæрд фæуæрæхдæр – бахастой йæм дыргъдæтты æнæкоммерцион æмбаладты газификацийыл куыст дæр. Афтæмæй бацайдагъ куыст уыцы цæрæн бынæттæм дæр газы хæтæлтæ бауадзыныл. Уыцы архайдæн дæр сарæзтой сæрмагонд пълан 2025-2030 азты æмгъуыдмæ.
Абоны онг уый бындурыл компани «Газпром газорас-пределение Владикавказ» бакодта бæлвырд куыст. Зæгъæм, дыргъдæтты æмбалад «Аграрник»-ы фæзуатмæ ныридæгæн бахæццæ газуадзæн, æмбалад «Ир»-ы дæр уыцы куыстмæ хæстæгдæр рæстæг бавналдзысты – ныртæккæ бæлвырдгонд цæуы подрядон организаци. Дыргъдæтты æмбалад «Ахуыргæнæг»-мæ цы хæтæл бауагътой, уый та сифтонг кодтой газуарæн дыууæ пунктæй (ахæм техникон фæрæзты фæрцы фæлхасгæнджытæм газ фагæй хæццæ кæны). Ахæм куыстытæ хæстæгдæр аз нысангонд цæуынц æмбаладтæ «Горянка», «Локомотив», «Дружба» æмæ иннæты. Уыцы æмбаладтæм газы хæтæлтæ бауадзынæн ныртæккæ арæзт цæуы хъæугæ документаци…
Дмитрий АСТАХОВ
