«Нымæцон ликбез», кæнæ «кибербезопасность» у Æппæтуæрæсеон рухстауæн проект нымæцон ахуырадон къабазы. Æххæстгонд цæуы автономон æнæкоммерцион организаци «Нымæцон экономикæ» æмæ Уæрæсейы Федерацийы Нымæцон рæзт, бастдзинад æмæ дзыллон фæрæзты коммуникациты министрады æххуысæй.
Дзæуджыхъæуы 46-æм астæуккаг скъолайы ацыд гом урок Æппæтуæрæсеон проект «Нымæцон ликбез»-ы фæлгæты. 8- æмæ 9-æм кълæсты ахуырдзаутæн РЦИ-Аланийы Нымæцон рæзты комитеты сæрдары хæдивæг Калоты Амур æмæ республикæйы мидхъуыддæгты министрады минæвар Олег Мальков радзырдтой, интернеты хызы хи цæстфæлдахджытæй куыд бахъахъхъæнын хъæуы, уый тыххæй.
Интерактивон фæйнæгыл сын равдыстой цæстуынгæ æрмæг, царды цавæр уавæртимæ ис сæмбæлæн, æнæзонгæ адæймаг дæм мессенджеры куы ныффысса, уæд хи куыд дарын хъæуы æмæ афтæ дарддæр.
– Уе ’ппæт дæр пайда кæнут чырæг телефонтæй. Уыдон сты чысыл компьютертæ. Сæ фæрцы уын фадат ис интернеты хызы кинотæм кæсынæн, хъазынæн алыхуызон хъæзтытæй, музыкæмæ хъусынæн æмæ афтæ дарддæр. Фæлæ йæ, æвæццæгæн, нæ зонут, æппæт уыцы программæты архайгæйæ уæ цæстфæлдахджыты бон афæливын кæйтбауыдзæн, уый. Уый тыххæй та уæ хъæуы къæрцхъусдæр уæвын, – загъта Калоты Амур.
«Редан», «Синий кит» æмæ æндæр программæты нæ бæстæйы знæгтæ фыссынц сывæллæттæм, цæмæй скъолатæ æмæ базарадон центртæм рæмудзæн æрмæг бахæссой, сæ ныййарджыты телефонты номыртæ æмæ парольтæ сæ расайынц, цæмæй сын сæ картæтæй се ’хцайы фæрæзтæ сисой.
Ахуырдзаутæ гом урочы базыдтой, интернеты тыгъдады цæстфæлдахджытæ цавæр мадзæлттæй пайда кæнынц, алыхуызон фыдракæндтæ саразынмæ сæ куыд сразæнгард кæнынц, уый фæстæ та сæ куыд фæтæрсын кæнынц банымудзынæй, уый. Алы уавæрæй дæр ис æдасæй рахизæн. Уый тыххæй сывæллæттæн хъæуы дзурын, тæссаг уавæры хистæрты æххуыс куыд бацагурой, мессенджерты æнæзонгæ адæмыл куыд нæ æууæндой, афтæ.
ХЪОЙБАЙТЫ Галинæ
