Фæсивæды ‘хсæн мидхъуыддæгты оргæнты службæ скадджын кæнынæн æмæ скъолатæ каст чи фæуыдзæн, бæстæйы Мидхъуыддæгты министрады
ахуыргæнæндæттæм ахуыр кæнынмæ бацæуынмæ уыцы лæппуты сразæнгард кæнынæн Алагиры районы мидхъуыддæгты хайады кусджытæ Алагиры 2-æм скъолайы фарæстæм кълæсты ахуырдзаутимæ сарæзтой æмбарынгæнæн фембæлд.
Мидхъуыддæгты министрады уæлдæр ахуыргæнæндæттæм ахуыр кæнынмæ æмæ мидхъуыддæгты оргæнтæм кусынмæ бацæуæн куыд ис, стæй пъæлицæйы кусджытæн цавæр льготæтæ æмæ социалон зæрдæдарæнтæ фидаргонд æрцыдысты, фембæлды рæстæг амынд хайады профессион цæттæкæнынады къабазы специалист, пъæлицæйы кæстæр лейтенант Быгъуылты Альберт æмæ Ветеранты советы уæнг, пъæлицæйы отставкæйы капитан Хъайттаты Валери скъоладзаутæн уыдæтты тыххæй бæлвырд хабæрттæ радзырдтой.
Скъолайы уазджыты ныхасмæ гæсгæ, мидхъуыддæгты оргæнты ахуыргæнæндæттæм кандидаттæ æвзарыны рæстæг уæлдай фылдæр æргом здахынц адæймаджы удыхъæды миниуджытæм, стæй йæ физикон цæттæдзинадмæ. Уымæй уæлдай, барадхъахъхъæнджытæ скъоладзауты базонгæ кодтой пъæлицæйы куысты хицæн æууæлтимæ.
Фембæлды кæрон ахуырдзаутæ скъоламæ æрбацæуæг адæймæгтæн æмбарынгæнæн ныхасы тыххæй бузныг загътой æмæ зæрдæ бавæрдтой скъола каст фæуыны фæстæ амынд министрады ахуыргæнæндæттæм ахуыр кæнынмæ бацæуыныл ахъуыды кæнынæй.
Гæззаты Зæринæ,
Алагиры районы
мидхъуыддæгты
хайады инспектор
