Республикон клиникон рынчындоны фæзынд реанимацион ног хайад. Ис дзы, пъланон вазыгджын операциты фæстæ рынчынты кæм дардзысты, 11 ахæм бынаты.
Уыцы рынчынтæн реанимацийы ис хицæн блок, цæуыны бар æм уыдзæн æрмæстдæр дохтыр кæнæ медицинон хойæн. Ифтонггонд у нырыккондæр медицинон техникæйæ, стæй, дохтырмæ фæдзурæн цы дзæнгæрæгæй ис, ахæмæй, йæ фæрцы специалистæн гæнæн уыдзæн рынчынимæ дæрддзæфмæ уагæй ныхас кæнын дæр.
Дохтыртæ куыд зæгъынц, афтæмæй, зæронд реанимацийыл цы стыр уаргъ æвæрд уыд, уый ног реанимацийы фæрцы ныр фæрогдæр уыдзæн. Зæронд реанимацийы раздæр уыд 17 бынаты, ныр та ма дзы баззад 13. Дыууæ реанимацийы (иумæ сæ нымайгæйæ) рынчынытæн ис 24 бынаты. Ног реанимаци цы бæстыхайы æрбынат кодта, уый канд цалцæггонд не ‘рцыд, фæлæ ма дзы æрæвæрдтой нырыккондæр медицинон ифтонггæрзтæ.
– Нæ республикæйы уый у нырыккондæр реанимацион хайæдтæй иу. Æппæт ифтонггæрзтæ дæр сты дзыхъхъынног, сæ фæрцы ис тынг бæрзонд æмвæзадыл медицинон æххуыс кæнын. Раздæр реанимацион палатæты уыд рынчынтæн цыппар бынаты, ныр та иу пост у дыууæ палатæйы. Ис дзы нырыккон уавæртæ, уыдон дæр
ахъаз уыдзысты, рынчынтæ цæмæй тагъддæр дзæбæх кæной, уымæн, – загъта РЦИ-Аланийы æнæниздзинад хъахъхъæнынады министр Митциты Астан.
Официалон æгъдауæй реанимацион ног хайад цы бон байгом, уымæй кусын райдыдта ноджы раздæр. Раззагдæр федералон медицинон центрты цæттæ-
дзинады курсытæ чи ацыд, Республикон клиникон рынчындоны уыцы кусджытæ хайады ног гæнæнтимæ ныридæгæн базонгæ сты.
– Райстам нырыккон техникæ – ИВЛ-аппараттæ, туг сыгъдæггæнæн аппараттæ. Сæ фæрцы нæ медицинон кусджытæ рынчынтæн кæнынц зæрдиаг æххуыс, – зæгъта реанимаци æмæ анестезиологийы хайады сæргълæууæг Майрæнсауты Галинæ.
Нæ уацхæссæг
