Цæгат Ирыстоны паддзахадон университеты 1 апрелы уыд Хетæгкаты Къостайы номарæн цæлх-æмбырд. Фембæлд бацæттæ кодта ЦИПУ-йы журналистикæйы факультет, йæ архайджытæ та систы зындгонд ахуыргæндтæ, студенттæ æмæ уазджытæ Хуссар Ирыстонæй, Абхаз æмæ Белоруссийæ.
Æмбырд амыдта журналистикæйы факультеты декан Хæбæлаты Фатимæ. Уый йæ раныхасы куыд фæбæрæг кодта, афтæмæй фембæлд саразджытæн уæлдай æхсызгон уыд, æфсымæрон республикæты минæвæрттæ Къостайы номарæн мадзалмæ зæрдиагæй кæй саккаг кодтой, уый.
«Сыхаг паддзахæдты минæвæрттæн арфæ кæнын, абон немæ кæй сты, æнæмæлгæ Къостайы кадæн æмбырды кæй архайынц, уый тыххæй. Бузныг зæгъын, горæты администраци æмæ республикæйы æхсæнадон иугæндты уæнгтæн дæр – уыдон дæр цымыдисдзинад равдыстой нæ абоны фембæлдмæ. Абон мах не ‘ппæты дæр æрбангом кодта Хетæгкаты Къоста», – загъта Хæбæлаты Фатимæ.
Æмбырды архайджытæн арфæ ракодтой ЦИПУ-йы проректор Тенгиз Тиникашвили, Дзæуджыхъæуы бынæттон хиуынаффæйады администрацийы сæргълæууæджы хæдивæг Ходы Мæдинæ, РЦИ-Аланийы Мыхуыр æмæ дзыллон коммуникациты хъуыддæгты фæдыл комитеты сæрдары хæстæ рæстæгмæ æххæстгæнæг Эльдар Афашоков, Цæгат Ирыстоны Парламенты депутат Елена Князева æмæ иннæтæ.
Уый фæстæ Къостайы цард æмæ сфæлдыстады тыххæй ахадгæ докладтæ скодтой Абхазы паддзахадон университеты минæвар Ахра Анкваб, уазджытæ Белоруссийæ – Могилевы паддзахадон университеты кафедрæйы сæргълæууæг Ольга Билык æмæ культурологийы доктор, профессор Зинаида Жукотская, Хуссар Ирыстоны паддзахадон университеты ирон литературæйы кафедрæйы ахуыргæнæг Кокойты Тарзан, ЦИПУ-йы ирон филологийы факультеты декан Гуытъиаты Эльмирæ æмæ иннæ ахуыргæндтæ.
Уыдонæй уæлдай, журналистикæйы факультеты студенттæ æмæ ахуыргæнджытæ рæгъмæ рахастой Къостайы цардимæ баст иртасæн æмæ сфæлдыстадон проекттæ…
Цæлхæмбырды программæйы уыдысты къамты презентаци æмæ нывты равдыст «Æппæт дуне – мæ кувæндон».
Мадзалы сæрмагонд бынат бацахстой поэты цард æмæ сфæлдыстадимæ баст чингуытæ æмæ æндæр мыхуырон фæрæзтæ дæр.
Нæ уацхæссæг
