Цæгат Ирыстоны Архивон службæйы бæрнон кусджыты делегаци уазæгуаты уыд Махачкалайы. Сæ дагестайнаг æмгуыстгæнджытимæ сын уыд цымыдисаг фембæлдтытæ.
2025 азы кæй сфидар кодтой, архивон къабазы æмгуыстады фæдыл уыцы бадзырды фæлгæты Дагестаны юстицийы министр Мустапа Генжеханов æмæ бынæттон архивисттæн уыд кусæг фембæлд Цæгат Ирыстоны архивисттимæ, сæ сæргъы РЦИ-Аланийы Архивон службæйы разамонæг Хайманты Барис, афтæмæй.
Дыууæ делегацийы фембæлдысты Дагестаны Юстицийы министрад æмæ Центрон паддзахадон архивы. Сæ архайджытæ кæрæдзи базонгæ кодтой архивтæ нымæцон хуызмæ раивыны фæлтæрддзинадимæ, æрныхас кодтой, документты къопитæ электронон хуызы аразыны, равдыстытæ цæттæ кæнын æмæ нырыккон технологитæй пайда кæныны фарстатыл, стæй иумæйаг проекттæ, наукон-практикон конференцитæ аразыны, архивон хъусынгæнинæгтæ парахат кæныны, æфсымæрон дыууæ адæмы историон бастдзинæдтæ фидар кæныны хъуыддæгтыл.
Фембæлды архайджытæ, се ‘хсæн Дагестаны Юстицийы министрады архивты хъуыддæгты фæдыл хайады разамонæг Татьяна Кочеткова, Дагестаны Центрон паддзахадон архивы директор Ольга Бекаева, РЦИ-Аланийы Центрон паддзахадон архивы директор Зассеты Ларисæ æмæ Цæгат Ирыстоны нырыккон историйы паддзахадон архивы хайады сæргълæууæг Гуыдиаты Артур бафиппайдтой, ахæм фембæлдтытæ практикон æгъдауæй ахсджиаг кæй сты, уый, æмæ баныхас кодтой дарддæры æмгуыстадыл.
Нæ республикæйы архивисттæ фысымтæн балæвар кодтой Хъызлары историимæ, Хасавюрты æфсæддон госпиталы, къупецаг М. Дадашевы номыл коньяктæ уадзæг заводы æмæ æндæр бæстыхæйтты историимæ баст 1902 азы документты къопитæ.
Дагестайнаг архивисттæ та сæ цæгатирыстойнаг æфсымæртæн балæвар кодтой, вазыгджын æмæ, историон æгъдауæй аргъ кæмæн нæй, ахæм гæххæттытæ ХХ æнусы райдайæны революцион архайæг, Дагестаны облæсты комитеты сæрдар, кæрдзинаг Дудараты Сафары, елхотаг, Сырх Тырысайы орденхæссæг Хуытъинаты Мæхæмæт (Михаилы) æмæ æндæр зындгонд адæймæгты тыххæй.
Ацы æмæ æндæр документтæй фæхъæздыгдæр уыдзысты Цæгат Ирыстон æмæ Дагестаны архивон бынтæ, фæфидар уыдзысты дыууæ регионы цæрæг адæмты иудзинад æмæ хæлардзинад.
Нæ уацхæссæг
