РЦИ-Аланийы Сæргълæууæг Сергей МЕНЯЙЛОЙÆН фембæлд уыд, æвзарæн закъонæвæрынад æмæ æвзарджыты барты фæдыл æппæтуæрæсеон олимпиадæ «Софиум»-ы æнтыстдзинад чи равдыста, уыцы цæгатирыстойнаг скъоладзаутимæ. Фембæлды архайæг уыд РЦИ-Аланийы Æвзарæн къамисы сæрдар МОРГУАТЫ Жаннæ дæр.
Республикон физикон-математикон лицей-интернаты 11-æм къласы ахуырдзау Къалаты Валерия æмæ Октябрыхъæуы 1-æм скъолайы 11-æм къласы ахуырдзау Годжыцаты София систы олимпиадæйы уæлахиздзаутæ, Дзæуджыхъæуы 41-æм скъолайы 10-æм къласы ахуырдзау Чиаты Аланæ та бахауд призерты номхыгъдмæ.
Олимпиадæйы архайдтой æппæт уæрæсейаг регионты скъолаты 17 мин хистæркъласонæй фылдæр. Кæронбæттæны архайджытæ (уыдонимæ – Цæгат Ирыстоны минæвæрттæ дæр) систы 121 скъоладзауы 53 уæрæсе-йаг регионæй.
Сергей Меняйло чызджытæн арфæ ракодта, федералон конкурсы зæрдиагæй кæй архайдтой æмæ стыр
æнтыстдзинад кæй равдыстой, уый фæдыл.
– Иу хатт ма æвдисæн стæм, цы курдиатджын æмæ хъæппæрисджын, зонындзинæдтæм тырнæг фæсивæд нæм ис, уымæн. Нæ кæстæрты алкæцы æнтыстдзинадæй дæр вæййæм сæрыстыр – бузныг уын зæгъын! Арфæ кæнын уæ ныййарджытæ æмæ ахуыргæнджытæн дæр, бузныджы аккаг сты Æвзарæн къамисы кусджытæ, олимпиадæйы хæслæвæрдтæ æххæст кæныны хъуыддаджы уын зæрдиаг æххуыс кæй бакодтой, уый тыххæй, – бафиппайдта Сергей Меняйло.
Уый фæстæ республикæйы Сæргълæууæг скъоладзауты схорзæхджын кодта æппæтуæрæсеон олимпиадæйы дипломтæй.
Чызджытæ райгондæй баззадысты фембæлдæй, куыд радзырдтой, афтæмæй сæ фидæны дæсны-йадæн равзарынвæнд кæнынц юриспруденци.
Олимпиадæ «Софиум»-ы архайджытæ æрвылаз свæййынц, æвзарæн закъонæвæрынад æмæ æвзарæн процессы тыххæй нормативон уагæвæрдтæм цымыдисдзинад чи ‘вдисы, уыцы хистæркъласонтæ. Специалисттæ куыд зæгъынц, афтæмæй фидæны юристтæн ацы олимпиадæ уæлæмхасæн фадат дæтты арфдæр æмæ æххæстдæр зонындзинæдтæ юриспруденцийы къабазы райсынæн.
РЦИ-Аланийы Сæргълæууæг æмæ Хицауады пресс-службæ
