Нæ республикæйы Хицауады радон æмбырд амыдта йæ Сæрдар Дзанайты Барис. Хицауады уæнгтæ, ведомствæты разамонджытæ рæгъмæ рахастой нæ республикæйы цæрджытæн ахсджиаг фарстатæ.
Ивгъуыд 2025 азы РЦИ-Аланийы социалон-экономикон рæзты бæрæггæнæнтимæ æмбырды архайджыты базонгæ кодта нæ республикæйы экономикон рæзты министры фыццаг хæдивæг Олег Быкадоров. Куыд фæбæрæг кодта, афтæмæй промышленнон продукци рауагътой, ивгъуыд азимæ абаргæйæ, 11 проценты фылдæр, арæзтадон куыстуæттæ дæр æфтиаг райстой 35,5 миллиард сомы. Уæдæ базарады къабаз дæр размæ рацыд 3,8 проценты.
– Нæ бæстæйы ныхмæ цы санкцитæ æвæрд ис, уыцы уавæрты дæр хъæугæ товартæ ис фаг, æнæкъуылымпыйæ куыстой æмæ уæйгæнæг организацитæ сфæстауæрц кодтой продукци, – загъта Быкадоров.
Хойраджы продукттæ кæм цæттæ кæнынц, уыцы æхсæнадон бынæттæ, 2024 азимæ абаргæйæ, æфтиаг райстой 9,2 проценты фылдæр.
– Инвестицион архайды райрæзты фæлгæты кусы республикæйы экономикон рæзты хуызæг. Уый бындурыл фарон царды рауагътам фондз стыр проекты. Сæ аргъ 74 миллиардæй фылдæр кæмæн у, уыцы проекттæ кусдзысты туризм, транспорт æмæ промышленнон комплексы рæзтыл. 2030 азмæ фæзындзæн 3747 ног куысты бынаты. Ныридæгæн уал скуыстой аэропорт «Владикавказ»-ы ног аэровагзалы комплекс, таможняйы логистикон парк «Южные ворота» æмæ стыр дыргъдон «Казачий хутор»-ы егъау дыргътæ æфснайæны арæзтад дæр кæронмæ ахæццæ, – бафтыдта министры хæдивæг.
Дарддæр ныхас кодта, 2025 азы сæ бæрæггæнæнтæ раппæлинаг кæмæн не сты, уыцы къабæзтыл. Зæгъæм, фæфылдæр ис æгуыст адæмы нымæц.
РЦИ-Аланийы хъæууон хæдзарады министры хæдивæг Къадзаты Игоры курдиатмæ гæсгæ, ивддзинæдтæ бахастой хæрзмыггаг фосдарынады къабазæн æххуысæн субсидитæ дæттыны тыххæй Хицауады уынаффæмæ, стæй, цы хæрдзтæ скодтой, уыдоны ныхмæ дæр субсидитæ дæттынæн.
Æнæмæнгæй ацы æххуыс фæзындзæн хæрзмыггаг фосы нымæцыл, нырыккон технологитæ ахъаз уыдзысты продукци фылдæр райсынæн, иумæйагæй та – стурвосы нымæц фæфылдæр кæнынæн.
Уымæй уæлдай ма, министры хæдивæг загъта, алывæрсыг æххуыс кæй уыдзæн, дыргътæ æмæ гагадыргъты куыст чи кæны, уыдонæн, сæ хæрдзты кæцыдæр хай сын паддзахад фæстæмæ бафиддзæн грантты хуызы. Йæ нысан у, хъæууон хæдзарадæн бынæттон продукци нæ базарты, дуканиты тæрхæджытыл цæмæй уа. Æдæппæтæй 2026 азы хъæууон хæдзарады рæзтæн радих кæндзысты иу миллиард сомы.
РЦИ-Аланийы арæзтад æмæ архитектурæйы министр Бетанты Марат цы фарстатыл дзырдта, уыдонæй иу баст уыд, арæзтадон къабазы фыццæгæм разряды хуымæтæг кусæгæн ивгъуыд аз йæ мызд кæй уыдис 42 мин сомæй фылдæр, кæнæ 2024 азæй авд проценты фылдæр.
РЦИ-Аланийы ахуырад æмæ наукæйы министры хæдивæг Дзанайты Марк дзырдта сывæллæтты сæрдыгон фæлладуагъды фарстатыл 2026 азы, стæй ахуырады къабазы кусджытæн мызд фидыны тыххæй, Хицауады уынаффæмæ ивддзинæдтæ бахæссыныл.
Сæрмагонд æфсæддон операцийы архайджытæн, сæ бинонтæн æххуыс дарддæр дæр уыдзæнис, цавæр æххуыс, уый тыххæй дзырдта РЦИ-Аланийы фæллой æмæ социалон рæзты министр Абайты Юри.
Æмбырды ма ныхас кодтой æндæр ахсджиаг фарстатыл.
Гугкаты Жаннæ
