Сæрмагонд æфсæддон операцийы чи архайы, уыцы хæстонтæ æмæ сæ бинонтæн æппæтвæрсыг æххуысы мадзæлттæ Цæгат Ирыстоны арæзт цæуынц иудадзыгон фæткыл. Уыимæ, амынд къорды адæмы минæвæрттæн социалон æмæ æндæр ахæм лæггæдтæ кæнынц, куыд профилон паддзахадон оргæнтæ, афтæ бынæттон хиуынаффæйад æмæ æхсæнадон иугæндты специалисттæ дæр.
Зæгъæм, республикæйы ахадгæ хуызы æххæстгонд цæуы хæрзаудæн акци «Помогаем СВОим». Уыцы мадзалы фæлгæты горæт æмæ хъæууон муниципалитетты æмвæзадыл сæ куыст кæнынц сæрмагонд службæты специалистты цæугæ къордтæ. Уыдон арæзт æрцыдысты адæмæн социалон лæггæдты комплексон центрты бындурыл.
Мобилон къордты уæнгтæ амынд центрты фæзуаты фембæлынц сæрмагонд æфсæддон операцийы архайджыты бинонтимæ: раттынц сын алыхуызон консультацитæ, æххуыс сын кæнынц хъæугæ гæххæттытæ саразыны хъуыддаджы, бацамонынц сын социалон реабилитаци æмæ æндæр ахæм паддзахадон зæрдæрдарæнты фæтк… Цæугæ къордты минæвæрттæ сæрмагонд æфсæддон операцийы архайджыты бинонтимæ фембæлынц сæ хæдзæртты дæр, сбæлвырд сын кæнынц сæ царды уавæртæ, сæ тыхстаг фарстатæм сын раздахынц профилон ведомствæты æргом.
Дзæуджыхъæуы администрацийы куыд фехъусын кодтой, афтæмæй мобилон къордты куысты зæрдиагæй архайынц муниципалитеты структурон дæлхайады минæвæрттæ дæр. Афтæ, ацы бонты Цæгат-Ныгуылæйнаг æмæ Терчыфалейы мидгорæтаг администрацийы кусджытæ бабæрæг кодтой амынд районты цæрæг бинонты, бакодтой сын юридикон æмæ æндæр æххуыстæ…
Дзæуджыхъæуы муниципалитеты минæвар куыд фæбæрæг кодта, афтæмæй 2025 азы акци «Помогаем СВОим»-ы фæткы бындурыл специалистты мобилон къордтæ фембæлдысты сæрмагонд æфсæддон операцийы архайджыты дæсгай бинонтимæ. Фæстаг цалдæр азы дæргъы та акцийы мадзæлттæ аххæссыдысты амынд къорды 257 бинонтыл.
«Помогаем СВОим» æмæ иннæ хæрзаудæн мадзæлттæ дарддæр дæр æххæстгонд цæудзысты.
Дмитрий АСТАХОВ
