«Инфраструктурæ – цардæн»: пъланы бындурыл куыст
РЦИ-Аланийы Сæргълæууæг Сергей МЕНЯЙЛО видеоконференцийы бастдзинады фæрцы архайдта, Уæрæсейы Арæзтад æмæ цæрæнуатон-коммуналон хæдзарады министрады коллеги æмæ Паддзахадон советы национ проекттæ æххæст кæныны фарстаты фæдыл сæрмагонд къамисы иумæйаг æмбырды.
Фембæлды архайджытæ бæстон æрдзырдтой, фыццаградон национ проект «Инфраструктурæ – цардæн»-ы уагæвæрдтæ ивгъуыд азы куыд æххæстгонд æрцыдысты, стæй хæстæгдæр фидæны уыцы программæйы фæлгæты цы куыстытæ бакæнын хъæудзæн, ууыл.
Æмбырды сæрдариуæггæнæг – Уæрæсейы Хицауады Сæрдары хæдивæг Марат Хуснуллин йæ раныхасы куыд фæбæрæг кодта, афтæмæй 2025 азы йæ тыхы бацыд ног национ проект «Инфраструктурæ – цардæн».
– Уыцы программæйы мадзæлттæ азы дæргъы афойнадыл æххæстгонд цыдысты, нысангонд бæрæггæнæнтæ къухы бафтыдысты. Уыцы æнтыстдзинады бындур у æппæт профилон ведомствæтæ æмæ бæстæйы регионты æнгом æмархайд. Раздæр куыд уыд, афтæ ныр дæр арæзтадон къабаз у экономикæйы дарддæры райрæзты сæйрагдæр рахæцæнтæй иу. Фæстаг бæрæггæнæнтæм гæсгæ, арæзтадон къабазы бавæрæн мидбæстон иумæйаг продуктмæ схæццæ 22 триллион соммæ. Дзуаппон рæстæгмæ арæзт æрцыд цæрæнуæттæ æмæ æндæр бæстыхæйтты 150 милуан квадратон метры бæрц. 2019 азæй ранымайгæйæ та, сарæзтæуыд цæрæнуæтты 685 милуан квадратон метрæй фылдæр. 2030 азы онг къабазы размæ цы ахсджиаг нысантæ лæууы, уыдоны бындурыл хъуамæ ноггонд æрцæуа цæрæнуатон фонды æртыккаг хай, стæй иу адæймаджы хыгъдмæ цæрæнуатон фæзуаты бæрц рæстæмбис нымадæй суа 33 квадратон метры бæрц. Уыдон фидæны нысантæ – хъæуы сыл бæстон бакусын. Абоны æнтыстдзинæдты тыххæй та бузныг зæгъын, къабазы куыстмæ бар чи дары, æппæт уыцы специалисттæ æмæ фæллойгæнджытæн, – загъта Марат Хуснуллин.
Хицауады Сæрдары хæдивæг зæрдыл æрлæууын кодта фидæнмæ хæстæ дæр: Президент Владимир Путины уынаффæйæ 2030 азы онг сæ цæрæнуатон уавæртæ хъуамæ фæхуыздæр уой 2160 горæттæ æмæ хъæуты цæрджытæн (æмткæй райсгæйæ, уыцы уынаффæ хъуамæ сахада Уæрæсейы граждæнты 70 процентыл). Уыцы нысантæ сæххæст кæныны фæдыл æнгом æмархайд ис æппæт регионтимæ дæр. Абоны онг регионты æмвæзадыл фидаргонд æрцыдысты фæзуæтты комплексон райрæзты пълантæ. Уыцы хъуыддаджы регионтæн æппæтвæрсыг æххуыс кæнынц УФ-йы Арæзтады министрад, Фæзуæтты райрæзты федералон фонд æмæ æндæр профилон структурæтæ.
Марат Хуснуллин йæ раныхасы æрлæууыд ипотекон программæтæ æххæст кæныны фæткыл, цæрæнуатон-коммуналон хæдзарады инфраструктурæйы модернизацийыл æмæ æндæр ахæм фарстатыл. Йæ ныхасмæ гæсгæ, ипотекон программæтæ сæ ахадындзинад æвдисынц. Уыдоны фæрцы 2018 азæй нырмæ сæ царды уавæртæ фæхуыздæр сты 3,8 милуан бинонтæн. Зынгæ хуыздæр куыст цæуы цæрæнуатон-коммуналон хæдзарады объектты рацарæзтыл дæр. Зæгъæм, ивгъуыд азы федералон программæты фæрцы ивд æрцыдысты коммуналон хæтæлты 8 мин километры бæрц, бындуронæй сцалцæг кодтой 1,5 мин цæрæнуатон объектæй фылдæр…
РЦИ-Аланийы Сæргълæууæг æмæ Хицауады пресс-службæ
