Республикæйы Сæргълæууæг æмæ Хицауады Администрацийы разамонæг Гобеты Ибрагим скодта Адæмты иудзинады азимæ баст оргкомитеты æмбырд.
Йæ разныхасы куыд фæбæрæг кодта, афтæмæй Уæрæсейы Президент Владимир Путин 2026 аз расидт Адæмты иудзинады азæй. Уый бирæнацион уæрæсейаг адæм æрбангом кæндзæн, сæ бирæвæрсыгдзинад сын ноджы хъæздыгдæр фæкæндзæн. «Нæ республикæ у, сæдæгай адæмыхæттытæ хæларæй æмæ разыйæ кæм цæрынц, ахæм регион. Уыцы бирæвæрсыгдзинады ис нæ тых. Уæрæсейы национ политикæйы бындуры æвæрд ис, нæ бæстæйы рагæй чи цæры, уыцы алы адæмыхатты æвæджиауы хæдхуыз», – загъта Гобейы-фырт.
Куыд бацамыдта, афтæмæй, кæрæдзийæн кадгæнгæйæ, культурон алыхуызондзинад æмбаргæйæ, граждæнтæн арæзт цæуынц нывыл царды уавæртæ. «Алы æвзагæн, традицитæн, историон зæрдылдардæн æмæ культурон хицæндзинæдтæн фадæттæ аразгæйæ, нæ бæстæйы æдас-дзинад æмæ хæдбардзинадæн аразæм бындур», – ахæм уыд Республикæйы Сæргълæууæг æмæ Хицауады Администрацийы разамонæджы хатдзæг.
Адæмты иудзинады азмæ цы ахсджиаг мадзæлттæ бацæттæ кодтой, уый тыххæй раныхас кодта национ политикæйы ведомствæйы раза-монæг Бæгъиаты Алан. «Ацы бæрæг аз нын фадат дæтты, цæмæй рæгъмæ рахæссæм, цалдæр дæсгай азты цы фæлтæрддзинадæй схъæздыг стæм, уый. Ирддæр дæнцæгæн æрхæссæн ис нациты ‘хсæн æхсæнадон змæлд «Нæ Ирыстон», ацы аз ыл æххæст кæны 35 азы», – радзырдта Бæгъиайы-фырт.
Цæгат Ирыстоны Адæмты иудзинады азмæ бацæттæ кодтой алыхуызон ахадын-дзинадимæ 100-йæ фылдæр хъуыддаджы. Аз райдыдта 6 февралы, республикæйы Национ библиотекæйы йæ кадджын уагæй байгом кодта РЦИ-Аланийы Сæргълæууæг Сергей Меняйло. Æнæмæнг, бирæ æхсызгон хъуыддæгтæ конд цæудзысты районты дæр. Алыхуызон акцитæ, фестивальтæ, уырдæм хуынд æрцæудзысты Кæсæг-Балхъары Республикæйы районты минæвæрттæ. Уæдæ, спортивон, æндæр культурон æмæ ахуырадон цаутæй дзаг уыдзæн 2026 аз. РЦИ-Аланийы Æхсæнадон палатæ дæр цæттæ кæны наукон-практикон цæлхæмбырдтæ.
Куыд зонæм, афтæмæй Адæмты иудзинады аз фæсидыны хъæппæрис рахас-та Хъазахъхъаг æппæтуæрæсеон æхсæнады атаман Виталий Кузнецов. Ныхас рауад Кремлы Нациты ‘хсæн ахастыты советы æмбырды 2025 азы 5 ноябры. Адæмты иудзинад зынгæ фæфидардæр уыдзæн алы адæмыхаттыты æвзæгтæ, культурæ, традицитæ хъахъхъæнгæйæ. Нæ бæстæ йæ адæмтæй хъæздыг у. Адæмты иудзинады аз зынгæ фæбæрæг уыдзæн национ иудзинадыл, сабырдзинадыл, разыдзинадыл.
РЦИ-Аланийы Сæргълæууæг æмæ Хицауады пресс-службæ
