Æппæтуæрæсеон куыстдæттæн армукъайы Дзæуджыхъæуы цæуæг регионалон хайы бавдыстой 400 кусæн бынатæй фылдæр.
Цыппæрæм аз дзыллон мадзал уыцы-иу рæстæг цæуы Уæрæсейы æппæт регионты. Армукъа Цæгат Ирыстоны байгом Алагиры æмæ Æрыдоны районты, стæй Дзæуджыхъæуы.
– Парахатæй цæуæг армукъайы архайынц канд куыстдæтджытæ нæ, фæлæ куыстагурджытæ дæр. Ныртæккæ фæллойы базары æгуыст адæмы нымæц стыр нæу, бирæтæ куыст агурынц. Нæ хæс у Æппæтуæрæсеон куыстдæттæн армукъайы фæрцы куыстдæтджыты æмæ куыстагурджыты кæрæдзимæ феввахс кæнын. Армукъайы фæрцы фæсивæдæн мастер-класстæ æмæ дзыллон профориентацион мадзæлттæ саразæм. Нæ зæрдæ кæуыл дарæм, фæсивæды нымайын фæллойы базары ахæм авналæныл, – зæгъы Адæмæн куыстдæттæг федералон службæйы разамонæджы хæдивæг Ян Талбацкий.
Куыстдæттæн армукъайы архайынц 40 цæгатирыстойнаг куыстуатæй фылдæр. Дзæуджыхъæуы æрбынæттонуæвæг Хæххон паддзахадон аграрон университеты сæйраг фæзмæ æрбацæуæг горæты æмæ Горæтгæрон районы 25 куыстуаты минæвæрттæ бавдыстой 400 кусæн бынатæй фылдæр.
– Нæ республикæйы адæм куыст ссарыны хъуыддагмæ стыр æргом кæй здахынц, кусæн бынæтты армукъа ууыл дзурæг у. Ирыстоны экономикон къабæзтæ парахатæй рæзынц. Бирæ ахадгæ проекттæ æххæстгонд кæй цæуынц, уый уынæм. Куысты лыстæг фæзилæнтæ хорз чи зоны, ахæм дæсны специалисттæ алы ран дæр хъæуынц, æмæ сын æппæтвæрсыг æххуыс кæндзыстæм, – зæгъы Цæгат Ирыстоны Хицауады Сæрдар Дзанайты Барис.
Олег Апрелев
