Дзæуджыхъæуы 40-æм скъолайы хъомыладон куыст бæрзонд æмвæзадыл æвæрд у. Ам кадджын уавæры байгом кодтой Хъайтарты партæтæ.
Нырæй фæстæмæ уыцы партæтæ уыдзысты лæгдзинад, намыс æмæ Райгуырæн бæстæйыл иузæрдиондзинады символтæ.
Партæтæ кæй номыл байгом кодтой, уыдонæй иу – Виктор Галкин Павелы фырт, Советон Цæдисы Хъæбатыр. Хъайтар кæрæй-кæронмæ фæцыд хæсты тугæйдзаг фæндæгтыл, уæззау цæф фæци Керчы, фæлæ стыр лæгдзинад равдыста, Керчы донбакæлæны сæрты хизгæйæ, æмæ йын уый тыххæй саккаг кодтой Хъайтары сыгъзæрин стъалы.
Хæсты фæстæ Виктор цард æмæ фæллой кодта Дзæуджыхъæуы, стыр хъомыладон куыст кодта фæсивæды ‘хсæн, йæ цард та сын уыд фæзминаг.
Ладо Давыдов Шириншайы фырт — хæстон сгарæг, Фыдыбæстæйы Стыр хæсты активон архайæг, Советон Цæдисы Хъæбатыр. Ассирийаг лæппу райгуырд Дзæуджыхъæуы, Сырх Æфсады рæнхъытæм бархийæ ацыд 1942 азы.
Ладо Давыдов Фыццаг Прибалтийаг фронты 43 æфсады 306 дивизийы рæнхъыты Витебскы облæсты цæугæдон Западная Двинайы сæрты бахызт йе сгарджыты къордимæ æмæ хъæу Шарыпинойыл уæззау тохы немыцаг штабы документтæ байста, амардта цалдæр немыцаг салдат æмæ афицеры. Уыцы сгуыхтдзинады тыххæй йын лæвæрд æрцыд Советон Цæдисы Хъæбатыры ном, йæ партæйыл та бадыны бар уыдзæн хуыздæр ахуырдзаутæн.
Александр Подковин Игоры фырт – Уæрæсейы Хъæбатыр фæмард сæрмагонд æфсæддон операцийы, йæ размæ æвæрд ахсджиаг хæстæ æххæстгæнгæйæ.
Кадджын мадзалы архайдтой Уæрæсейы Хъæбатыр Рубен Днепровскийы мад Татьяна Днепровская, Александр Подковины цардæмбал æмæ йæ лæппу.
Хъайтартæ нæ мæлынц, сæ рухс нæмттæ нын – æнусмæ мысинаг.
БУТАТЫ Азæмæт
