Уæрæсейы онкологон рынчынты дзæбæх кæндзысты алкæмæндæр йæхи сæрмагонд вакцинæтæй Æнæмæнг медицинон фæдзæхстады полисмæ гæсгæ. Уый тыххæй фехъусын кодта Уæрæсейы Хицауады Сæрдар Михаил Мишустин.
Æнæмæнг медицинон фæдзæхстады программæ фæуæрæхдæр кодтой, æмæ ныр полисмæ гæсгæ алы онкологон рынчынæн дæр ис фадат низæн йæ хуызмæ гæсгæ вакцинæ лæвар скæнын. Пациентты дзæбæх кæндзысты, цæмæй сæ иммунитет низы ныхмæ хæцын фæраза. Алы адæймагæн дæр вакцинæ кæндзысты, йæ низыхатт хицæндзинæдтæ хынцгæйæ. Уый хауы, йæ буарыл низ кæмæн апырх, уыцы рынчынтæм. Полисмæ гæсгæ фадат ис лæвар химион хостæ кæнæн, сæрмагонд æмæ бæрзонд технологон æххуыс исынæн, стæй молекулярон-генетикон иртæстытæ скæнынæн. Апрелæй дзы пайда кæнынц Уæрæсейы æппæт регионты, уыимæ, нæ республикæйы дæр. Онкологон низтæ дзæбæх кæнынц сæрмагонд мPHK-вакцинæтæй, чи апырх, уыцы колоректалон рак та – пептидон вакцинæ «Онкопент»-æй, стæй æндæр хостæй.
Æххуыс лæвар райсæн ис сæрмагонд паддзахадон медицинон уагдæтты, стæй, Æнæмæнг медицинон фæдзæхстады системæйы чи кусы, уыцы хи клиникæты. Цавæрфæнды регионæй дæр уæд рынчын – дзæбæх æй кæндзысты лæвар. Уый тыххæй та, пациенты чи дзæбæх кæны, уыцы дохтыр-онкологæй райсын хъæуы медицинон кусæндонмæ æрвитыны, стæй низ бæлвырд кæныны гæххæттытæ. Бæстондæр хабæрттæ базонæн ис Республикон онкологон диспансеры, науæд бынæттон фæдзæхстадон медицинон организацийы. Ацы ахсджиаг хъуыддаг арæзт æрцыд нацпроект «Дæргъвæтин æмæ сæрæн цард»-ы фæлгæты.
Æнæмæнг медицинон фæдзæхстады программæйы фæзынд æндæр ахсджиаг ивддзинад дæр. Баст у, хъæууон районты, стæй центрæй дæрддзæф ран чи цæры, уыцы æнхъæлцау сылгоймæгты ‘ххуысимæ. Æхсæнадон транспорт сылгоймæгты консультацитæ æмæ профилон уагдæттæм кæдæм нæ хæццæ кæны, уырдæм æмæ фæстæмæ здæхынмæ регионалон хицауад лæвар дæтдзысты транспорт. Дæргъвæтин æмæ сæрæн цард»-ы проекты сæйраг нысан у адæмы царды бонтæ фæфылдæр кæнынæн фадæттæ аразын. Афтæ, 2030 азмæ нысан кæнынц йæ бæрц 78 азмæ, 2036 азмæ та – 81 азмæ сæргъæвын. Нацпроекты фæрцы арæзт цæуынц медицинон кусæндæттæ, рæзы рынчынты реабилитацийы системæ, уæрæхдæр кæны национ иртæстыты центрты хыз, архайд цæуы æнæниздзинад хъахъхъæнынады куыст нымæцон æгъдаумæ раивыныл.
Æрмæг бацæттæ кодта ХУЫБИАТЫ Ларисæ
