РЦИ-Аланийы Сæргълæууæг Сергей МЕНЯЙЛО амыдта республикæйы Хицауады радон æрвылкъуырион аппаратон æмбырд. Регионы оперативон уавæр æмæ æндæр ахсджиаг фарстатыл ныхас кодта министрадтæ æмæ ведомствæты разамонджытимæ, районты хиуынаффæйады администрациты сæргълæуджытимæ.
РЦИ-Аланийы Граждайнаг хъахъхъæнынад æмæ æнæнхъæлæджы уавæрты комитеты сæрдар Александр Хоружий йæ доклады фехъусын кодта республикæйы оперативон уавæр:
– Ивгъуыд къуырийы дæргъы Цæгат Ирыстоны æппæт сæрмагонд службæтæ дæр архайдтой æрвылбоны цæттæдзинады уавæры. Цæгат Ирыстоны 20 апрелæй 26 апрелмæ æрцыд 5 зынгсирвæзты. Хъыгдард дзы ничи баййæфта. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 84 фæндаггон фыдбылызы. Хъыгдард дзы баййæфтой 11 адæймаджы, дыууæ дзы фæмард сты. Республикæйы хæххон районты тæссаг у зæйтæ рацæуынæй. Афæдзы райдайæнæй нырмæ сæхи ‘гъдауæй рацыдысты 43 зæйы. Хъыгдард дзы ничи баййæфта. Арвыком æмæ Транскамы фæндæгтыл ацæуыны бар ис автотранспорты æппæт хуызтæн дæр. Республикæйы фæндæгтыл лæууы 2870 транзитон уæзласæн машинæйы, 2800 та – электронон рады. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 14450 автотранспортон иуæг æмæ 35600 адæймаджы.
Æнæнхъæлæджы уавæрты министрады хъусынгæнинагмæ гæсгæ, фараст оперативон къорды районты администрацитимæ иумæ æрвылбон дæр бæрæг кæнынц республикæйы цæугæдæтты доны æмвæзад. Фидаргонд цæуынц цæугæдæтты былгæрæттæ, цæмæй, Цæгат Ирыстоны, Дагестаны цы фыдбæллæхтæ ‘рцыд, ахæмтæ ма ‘руадзой.
Цæгат Ирыстоны «Роспотребнадзор»-ы хъусынгæнинагмæ гæсгæ, республикæйы эпидемиологион уавæр у нывыл. ОРВИ-йæ рынчынты нымæц у æрвылазы эпидемион бæрæггæнæнтæй 3,8 проценты ныллæгдæр. Рынчынты 70 проценты сты сывæллæттæ. Грипп республикæйы ныр æхсæзæм къуыри бæрæггонд не ’рцыд. Ивгъуыд къуыри ног коронавирусон инфекци разынд дыууæ адæймагмæ.
Ахуырад æмæ наукæйы министр Алыбегты Эллæйы ныхасмæ гæсгæ, нæ республикæйы æппæт ахуырадон уагдæттæ дæр кусынц æрвылбоны фæткыл. Грипп æмæ ОРВИ-йы аххосæй æхгæд уагдæттæ республикæйы нæй.
– Ацы къуыри ахицæн уыдзæн Профессион дæсныдзинады 2-æм республикон сывæллæтты чемпионат «Мастерята Алании-2026». Архайдтой дзы 1700 ахуырдзауы республикæйы алы скъолатæй. 207 ахуырдзауы рацыдысты регионалон къæпхæнмæ, – загъта министр.
Дзæуджыхъæуы хиуынаффæйады администрацийы сæрдар Милдзыхты Вячеслав фехъусын кодта, ацы аз акци «Посмотри на их лица»-йы архайынæн 1073 курдиаты кæй балæвæрдтой, уый. Ныридæгæн уал хæстонты хуызистытæ бацахстой рекламон рæстæмбис фæзуæтты 40 проценты. Йæ ныхасмæ гæсгæ, 5 маймæ æппæт уыцы бынæттæ хуызистытæй æмбæрзт æрцæудзысты.
Сергей Меняйло фæбæрæг кодта:
– Куыддæр иунæг рекламон конструкцийыл дæр коммерцион рекламæ фенат, афтæ-иу æй æртонут. Æрмæстдæр ветерантæ æмæ хæстонты хуызтæ!
Ноджы ма республикæйы Сæргълæууæг районты разамонджытæн бафæдзæхста, Фыдыбæстæйы Стыр хæсты Уæлахизы бонмæ мемориалтæ æмæ цыртдзæвæнтæм куыд æмбæлы, афтæ базилын. Алагиры районы разамонæгæн бахæс кодта Алагирмæ бацæуæны мемориал «Танк Т-34», стæй йæм, цы асинтæ цæуы, уыдон дæр банывыл кæнын.
– Иу бон та мæхæдæг машинæйы сбаддзынæн æмæ сыл æрзилдзынæн, – загъта Сергей Меняйло.
РЦИ-Аланийы Сæргълæууæг æмæ Хицауады администрацийы разамонæг Гобеты Ибрагимæн Сергей Меняйло бафæдзæхста, районты разамонджытæ цæрджыты курдиæттимæ куыд кусынц, уый сбæрæг кæнын.
Цæгат Ирыстоны зымæджы хъармгæнæн рæстæг фæуыдзæн фыццæгæм майы. Уый тыххæй æмбырды фехъусын кодта РЦИ-Аланийы цæрæнуатон-коммуналон хæдзарад, артаг æмæ энергетикæйы министр Хъараты Тимур.
Сергей Меняйло республикæйы министрадæн бафæдзæхста, цалынмæ хъармгæнæн рæстæг цæуы, уæдмæ, электрон рухс æмæ иннæ царды ахсджиаг фæрæзтæ цæрджытæм æнæкъуылымпытæй куыд хæццæ кæной, афтæ, стæй зымæджы ног хъармгæнæн рæстæгмæ цалцæджы проект бацæттæ кæнын.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
