Уыд РЦИ-Аланийы Хицауады радон æмбырд. Амыдта йæ Сæрдар Дзанайты Барис. Хицауады уæнгтæ, ведомствæты разамонджытæ бæрнон ныхас кодтой нæ республикæйы социалон-экономикон рæзты фарстатыл.
Фыццаг уыд кадрты фарста. РЦИ-Аланийы национ политикæ æмæ æддагон бастдзинæдты министры хæдивæгæй 2027 азы маймæ снысан кодтой Къуымæллæгкаты Оледжы.
Нæ республикæйы бюджет 2025 азы куыд æххæстгонд æрцыд, уый тыххæй бæстон доклад скодта РЦИ-Аланийы финансты министры хæстæ æххæстгæнæг Оксанæ Карова. Афæдзы дæргъы закъонмæ ивддзинæдтæ хаст цыдысты, афтæмæй æххæстгонд цыд бюджетон политикæ. Куыд фæнысан кодта, афтæмæй бюджетмæ æфтиæгтæ æрбацыд 52 244 милуан сомы, уый у 100,8 проценты афæдзы пъланæй, уыимæ, хъалонтæ бюджетмæ æрбафтыд 22 266 милуан сомы. Хæрдзгонд æрцыд 56 020 милуан сомы.
– Куыд æрвылаз, афтæ ныр дæр нæ бюджет æххæст кодта социалон фарстатæ. Афтæмæй, 67 проценты хардз æрцыд социалон политикæ æмæ культурæйы фарстатыл. Фыццаградон фарста уыдис бюджетон кусджыты мыздыл бафтауын, уыцы нысанæн радих кодтам 10 миллиард сомæй фылдæр. Дарддæр дæр æххуыс цыдис сæрмагонд æфсæддон операцийы архайджытæ æмæ сæ бинонтæн, ивгъуыд 2024 азимæ абаргæйæ, уыд æртæ хатты фылдæр – 2 277 милуан сомы. 15 785 милуанæй фылдæр хардзгонд æрцыд ахуырады къабазæн, уый у фондз проценты фылдæр. Арæзт æмæ цалцæггонд цыдысты скъолатæ, рæвдауæндæттæ. Æнæниздзинад хъахъхъæнынады фарстатæн 2025 азы хардзгонд æрцыд 4460 милуан сомы бæрц, физикон культурæ æмæ спорты къабазæн радих кодтам 1744 милуан сомы, – загъта Оксанæ Карова æмæ лæмбынæг æрныхас кодта, республикæйы цардæн ахсджиаг чи у, уыцы фарстатыл.
РЦИ-Аланийы ахуырад æмæ наукæйы министр Алыбегты Эллæйы курдиат баст уыдис республикæйы уæлдæр ахуыргæнæндæттæ – Хæххон-металлургон институт, Цæгат Ирыстоны паддзахадон университет æмæ Уæрæсейы наукæты академийы дзæуджыхъæуккаг наукон центрæн республикæйы бюджетæй гранттæ субсидиты хуызы дæттыны фæтк сфидар кæнынимæ. Уыцы паддзахадон æххуыс æнæмæнг хъæуы наукон-иртасæн куыстæн.
Регионалон проект «Все лучшее – детям»-ы фæлгæты ифтонг цæудзысты скъолаты – химийы, биологийы, информатикæйы, музыкæйы æмæ иннæ кабинеттæ, уый тыххæй дæр фехъусын кодта Алыбегты Эллæ.
Паддзахадон программæ «РЦИ-Аланийы промышленносты рæзт»-ыл дзырдта министр Атараты Олег. Хицауады Сæрдар куыд фæбæрæг кодта, афтæмæй ацы фарстамæ стыр æргом здæхт цæуы, фæстаг рæстæг 600 милуан сомæй фылдæр райстой нæ промышленнон куыстуæттæ.
Æрдзон газæй пайда кæнынæн хъæугæ кусæнгæрзтæ балхæнын æмæ сæвæрынæн æххуыс – социалон газификацийы ахæм программæ кусы 2022 азæй. Уæдæй нырмæ 270 бинонтæ райстой æххуыс паддзахадæй. Уыимæ бастæй Хицауады уынаффæмæ ивддзинæдтæ бахæссыныл дзырдта РЦИ-Аланийы фæллой æмæ социалон рæзты министр Абайты Юри.
Æмбырды архайджытæ ныхас кодтой Æнæмæнг медицинон фæдзæхстады фонды архайдыл, хъæууон фæзуæтты райрæзтыл, Фыдыбæстæ хъахъхъæнджыты нæмттæ сæнусон кæныныл, адæмæн куысты бынæттæ раттыныл, цардæн уæлдай ахсджиаг цы хостæ сты, уыдоны æргътæм паддзахадон цæстдарды æмæ æндæр фарстатыл.
Гугкаты Жаннæ
