«Нæ бæллицтæ нын сæххæст кæнут» – ахæм ирд профилактикон мадзал ацыд стыр федералон фæндагыл.
Цæмæй фæндаггон-транспортон фыдбылызты нымæц къаддæр кæна, уыцы стыр нысанимæ Цæгат Ирыстоны Паддзахадон автоинспекцийы управленийы минæвæрттæ, се ’мкусджытæ, Рахизфарсы районы Фæндæгтыл æдасæй цæуыны паддзахадон инспекцийы хайадæй, Фæсивæды социализаци æмæ фыдбæллæхты медицинæйы центртæ сарæзтой иумæйаг зæрдæмæдзæугæ хъуыддаг.
Рахизфарсы районы Сывæллæтты аивæдты скъолайы хъомылгæнинæгтæ, сæ ахуыргæнæг Тегетаты Лаурæ æмæ директор Цæгæраты Альбинæйы æххуысæй бацæттæ кодтой ирд плакаттæ. Сабитæй дзы алчидæр сныв кодта йæ бæллиц. Равдыстой дзы сæ бинонты, балцы фæндаг, фидæны дæсныйад, сабыр царды нывтæ. Сæ гыццыл къухтæй дзы бафыстой сæ курдиæттæ шофыртæм: «Уырны нæ, кæй нæ фехъусдзыстут!» «Нæ бæллицтæ нын ма аскъуынут!» «Бахъахъхъæнут æппæты зынаргъдæр!»
Хистæркъласонтæ фæндаггæрон æрлæууыдысты плакаттимæ. Уымæй сæхимæ раздæхтой машинæйыл цæуæг алы фæндаггоны æргом дæр.
Паддзахадон автоинспекцийы инспектортæ урæдтой шофырты, сывæллæттæ та-иу сæм бауадысты, лæвар сын кодтой фæндæгтыл æдасæй цæуыны тыххæй зæрдылдарæнтæ æмæ зæрдæйæ цæуæг курдиат.
Фæлтæрдджын шофыртæ дæр-иу бафиппайдтой, сывæллæттимæ фембæлд сын сæ зæрдæ кæй бацагайдта æмæ сын æнæферохгæнгæ кæй уыдзæн, уый.
Мадзал саразджытæ скъоладзаутæн скодтой лæвæрттæ, уыдонимæ – газет «Добрая дорога детства»-йы ног номыр. Ацы газет ныр бирæ азты хуымæтæг æвзагæй, хъæлдзæгæй ахуыр кæны фæндæгтыл æдасæй цæуыны фæткыл.
РЦИ-Аланийы Паддзахадон автоинспекцийы управлени
