РЦИ-Аланийы Сæргълæууæг Сергей Меняйло фембæлд Культурон хъæппæристы президентон фонды 2026 азы грантты дыккаг конкурсы цæгатирыстойнаг уæлахиздзаутимæ. Фембæлд арæзт æрцыд Фонды фондзазон юбилейы кадæн.
Ацы аз 42 бавдыстæй æххуыс райстой 8 проекты – ацы бæрæггæнæнмæ гæсгæ нæ республикæ Цæгат Кавказы федералон зылды субъектты ‘хсæн бацахста фыццаг бынат. Æмткæй райсгæйæ, гранты хуызы фæрæзтæ сты 24,5 милуан сомы.
Сергей Меняйло зæрдиаг арфæ ракодта Культурон хъæппæристы президентон фонды 2026 азы грантты дыккаг конкурсы уæлахиздзаутæн.
– Гранттæ райсын сæйрагдæр нæу. Нæ культурæйы рæзтæн, йæ парахат кæнынæн, уыимæ, фæсивæды ‘хсæн хъæппæристæ уæм кæй фæзыны, сæйрагдæр уый у. Фæуæлахизуæвджыты ‘хсæн ис нæ адæмы истори æмæ традицитæ бахъахъхъæнынмæ арæзт проекттæ. Нæ адæмы равзæрд, нæ фыдæлтæй нæм цы æвидигæ хæзнатæ æрхæццæ сты, уыдон арæхстгай бахъахъхъæнын, историйы сыфтæ «райгас» кæнын, абоны фæлтæрты æргом сæм раздахын, цымыдисагæй сæ равдисын у вазыгджын æмæ арф темæ. Æхсызгон у, уыйбæрц хорз æмæ пайдайаг проекттæ царды уагъд кæй æрцæудзысты Цæгат Ирыстоны сымах руаджы æмæ Культурон хъæппæристы президентон фонды æххуысæй. Сымах сахъ фæсивæд стут, арфæ уын кæнын! – загъта РЦИ-Аланийы Сæргълæууæг.
Культурон хъæппæристы президентон фонды Дзæуджыхъæуы проектон офисы разамонæг Байаты Лолæ куыд фæбæрæг кодта, афтæмæй фæуæлахизуæвæг проекттæй дыууæ баст сты архитектурæйы къабазимæ, уый та уæлдай æхсызгондæр у, уымæн æмæ 2026 аз нæ субъекты Сæргълæууæг Цæгаг Ирыстоны расидт Архитектурæйы аз.
Фембæлды архайджытæ радзырдтой сæ проектты, стæй конкурсы архайыны фæлтæрддзинады тыххæй, республикæйы Сæргълæууæджы базонгæ кодтой сæ дарддæры пълæнттимæ.
Культурон хъæппæристы президентон фонды æххуыс гранттæн 2026 азы Цæгат Ирыстоны лæвæрд æрцыд æхсæнадæмон театралон фестиваль «Æртæ сæйраг сахары», «Дзæуджыхъæуы историйы куырдадзы цагъд сыфтæ», Мыстулаты Иринæйы номыл кавказаг фæндырæй цæгъдыны æхсæнадæмон конкурсæн, Æхсæнадæмон сæрысæйраг (аутентичный) кинойы фестиваль «Алани», литературон-сфæлдыстадон проект «Алани. Уый мæ зæхх у», сывæллæтты патриотон киноныв «Хъазахъхъæгтæ-стигъджытæ», культурон бынтæ бахъахъхъæныны проект «Дур, бынат, адæймаг – æмхуызондзинады æртæ сывæлдæджы (фæлтæры)» æмæ этно-центр «Фыдæлты хæдзар»-æн.
Ацы аз Культурон хъæппæристы президентон фонд сбæрæг кæндзæн йæ фондзазон юбилей. Уыцы рæстæг Цæгат Ирыстонæй гранттæ райсыны конкурсты архайдтой 395 командæйы, 47 проекты систы уæлахиздзаутæ æмæ республикæмæ æрбаздæхтой 147 милуан сомы грантты хуызы.
Культурон хъæппæристы президентон фонды Дзæуджыхъæуы проектон офис кусы дыууæ азы, консультацион æмæ методикон æгъдауæй æххуыс кæны республикæйы æнæкоммерцион æмæ коммерцион организацитæ, амалхъомты культурон, аивадон æмæ креативон индустрийы хъæппæристæн. Офис байгом 2024 азы апрелы Сергей Меняйлойы хъæппæрисæй.
РЦИ-Аланийы Сæргълæууæг æмæ Хицауады Администрацийы пресс-службæ
