Фыдæй-фыртмæ фæлтæртæ кæрæдзимæ лæвæрдтой, хистæртæ нын цы хорз æгъдæуттæ ныууагътой, уыдон. Уæздандзинад, куыстуарзондзинад, хистæртæн кад æмæ лæггад кæнын, иумæ рæзгæ фæлтæры хъомыл кæнын, фæсивæды разæнгард кæнын ахуырмæ, куыстмæ, спорты архайынмæ. Раст фæзæгъынц, алы адæймаг дæр йæ хъæубæстæй, йæ дзыллæйæ хæс дары, зæгъгæ.
Цæргæбонты фæкуыстон сабитимæ, æмæ мыл кæд азтæ цæуы, уæддæр куыдфæндыйы цæстæй кæсын мæ бон нæу алыварс дунемæ, фæнды мæ мæ уарзон Црауы хъæубæстæн исты хорзы бацæуын.
Ивгъуыд æнусы Црауы фыццаг цæрджытæ куы æрбынæттон сты, уæд рахастой се ‘мбырды иумæйаг уынаффæ – саразын нæ сывæллæттæн скъола, æнæ ахуырæй нæ кæстæрты ма ныууадзын. Уыдонимæ уыд мæ баба, авд сывæллоны фыд Баситы Дзандар дæр. Кæд адæм тынг мæгуыр цардысты, уæддæр алчидæр йе ‘вæрæн бахаста арæзтадмæ, æмæ 1926 азы дыууæуæладзыгон скъола йæ дуæрттæ байгом кодта ахуырдзаутæн. Бирæ фæсивæд амондджын къах авæрдтой йæ къæсæрæй.
Уыцы скъолайы бæстыхайæ ныр ницыуал баззад, историмæ бацыд. Црайуаг чызджытæ æмæ лæппутæн хорз ахуыр кæнынæн ис æппæт уавæртæ – уæрæх æмæ райдзаст кълæстæ. Фæлæ сын нæй спорты алы хуызтæй архайыны фадат. Æмæ цы гæнæн ис, цæуынц нæ кæстæртæ Алагир, Æрыдон æмæ Дзæуджыхъæуы секцитæм. Уыимæ нæхи хъæуы ис цæттæ тренертæ. Уыдонæй иу, Козаты Бибо, йæхи машинæйы сывæллæтты ласы Æрыдонмæ дзюдойæ архайынмæ. Нæ курдиатджын æрыгон спортсментæм ис æнтыстдзинæдтæ.
Абон мах куы нæ батыхсæм спортивон скъола саразыныл, уæд сомбоны кæстæртæ махæн уайдзæф кæндзысты. Æмвæнд, æмзондæй зæронд скъолайы бынаты спортивон артдзæст саразыны тыххæй нæ курдиат уæлдæр хицауадмæ бахастам.
Республикæйы Сæргълæууæг Сергей Меняйлойæн комкоммæ эфиры рæстæг мæхæдæг бамбарын кодтон æппæт црайуæгты курдиат.
Алагиры районы бынæттон администрацийæ нын дзуапп æрбарвыстой. Ныхас дзы цыдис, администраци кæй бацæттæ кодта проектон-сметон гæххæттытæ Црауы хъæуы спортивон комплекс саразынæн. Ацы объект хаст кæй æрцыдис, 2028 азмæ чи кусдзæн, уыцы комплексон республикон программæ «Арæзтад»-мæ, кæнæ паддзахадон программæ «Хъæууон фæзуæтты комплексон рæзт»-мæ.
Зæрдæ нын бавæрдтой, æмæ уый æхсызгон уыд алкæмæндæр.
Адæймаг бонæй-бонмæ диссаг хъусы. Разындис ахæм амалхъом адæм, æмæ зæронд скъолайы фæзуаты сфæнд кодтой аргъуан саразын. Алцыдæр хорз, фæлæ ныртæккæйы рæстæг ахсджиагдæр цы у, ууыл хъуыды кæнын хъæуы. Цард цыбыр у, азтæ тагъд згъорынц, фæлтæртæ тагъд ивынц. Цæй æмæ бацархайæм нæ кæстæртæн спортивон комплекс саразыныл.
Адæймагæн æрдзы стырдæр лæвар у уарзаг зæрдæ, бæстон зонд. Цæстуарзонæй, адæмы зæрдæмæ чи фæцæудзæн, ахæм хъуыддаг сараз, æмæ дын Хуыцау æххуысгæнæг уыдзæнис. Куы разынид, бæргæ, ахæм бонджын адæймаг, чи нæм фæкæса. Црайуæгтæ дæр иуварс не ’рлæудзысты.
Томайты Людæ,
педагогон фæллойы ветеран, Црауы хъæу
