Компаниты къорд «Бавари»-йы дæлхайад куыстуат«Фат-Агро»-йы специалисттæ сæ фæсарæйнаг æмгуыстгæнджытимæ кæрæдзийæн сæ фæлтæрддзинадæй фæхай кодтой картофы мыггаг æрзайын кæныны къабазы.
«Фат-Агро»-мæ куыстадон балцы ссыд мыггаджы картофы дунеон эксперт Рудольф Шварцель, швейцайраг Иртасæн центр «Агроскоп»-ы минæвар. Специалистæн ацы балц ахъаз у, 2021 азы чи райдыдта, уыцы æнгом æмгуыстады фæстиуджытæ фенынæн. Уæд Рудольф Шварцель зынгæ эксперт доктор Конг Лин Ле æмæ А.Г. Лорхы номыл Картофы федералон иртасæн центры ахуыргæндтимæ куыстуатæн æххуыс кодта мыггæгты селекцион центр саразыны.
Йæ балцы рæстæг Рудольф Шварцель базонгæ ис, абон «Фат-Агро»-йы картофы мыггаджы къабазы куыст куыд цæуы, стæй сарæзта практикон ахуыртæ халсаргуыстгæнджытæ, агрономтæ æмæ компанийы специалисттæн. Сæрмагондæй кæй бацæттæ кодтой, уыцы фæзуаты картофы алыхуызон низтæ алы сорттыл куыд рабæрæг вæййынц, уыдæттæ сбæлвырд кодтой. Эксперт лæмбынæг радзырдта культурæйы вирусон æмæ бактеритæй бафтæг низты тыххæй æмæ бацамыдта, куыд сæ рабæрæг кæнын хъæуы, уый тыххæй. Уыцы зонындзинæдтæ «Фат-Агро»-йы специалисттæн феххуыс уыдзысты, мыггагæн кæй байтауынц, уыцы æрмæджы алыхуызон къуыхцытæ аиуварс кæнынæн.
Рудольф Шварцель ма архайы картофы æнæниз сортты банк байтауыны хъуыддаджы. Ацы проект «Фат-Агро» царды уадзы хъæууонхæдзарадон наукæты доктор, А.Г. Лорхы номыл Картофы федералон иртасæн центры директоры хæдивæг Елена Овесима. Æмгуыстад ахызт арæнты сæрты. Хæстæгдæр рæстæг «Фат-Агро» йы специалисттæ Рудольф Шварцелимæ ацæудзыс-ты Сомихмæ, бынæттон аграритæн дзы сараздзысты «Быдыры бон». Мадзал арæзт æрцæудзæн компанийы партнертæ – «Агро Плюс»-имæ – уый бадзырды бындурыл парахат кæны «Фат-Агро»-йы селекцион картоф «Садон», «Спринтер» æмæ «Алани» Сомихы республикæйы фæзуаты.
Европæйы егъаудæр Цæгат-Кавказаг мыггаджы селекцион центр «Фат-Агро» Цæгат Ирыстоны байгом 2023 азы Компаниты къорд «Бавари»-йы разамонæг Битарты Вячеславы хъæппæрисæй картофы ног бæрзонд тыллæгæрзады мыггаджы сорттæ равзæрын кæнынæн. Центры продукци æлхæнынц нæ бæстæйы стырдæр картофы куыстгæнæн организацитæ, федералон æмæ регионалон базарадон хызтæм продукци чи хæццæ кæны, уыцы агрохолдингтæ. Уымæй уæлдай ма сын æмгуыстады бадзырдтæ ис Белорусси, Сомих æмæ Хъыргъызты республикæты.
БУТАТЫ Азæмæт
