Дзæуджыхъæуы Уырыссаг драмон театры уыдис Зассеты Мерабы сфæлдыстадон изæр. Хуссар Ирыстоны Национ музейы директор, Уæрæсейы Фысджыты цæдисы уæнг, æхсæнадон палатæйы сæрдары хæдивæг, «Аланты Ныхас»-ы координацион советы уæнг Зассеты Мераб йæ бирæ азты иузæрдион куысты фæдыл хорзæхджын æрцыди Федерацийы Советы майданæй, æхсæнадон дипломатийы орденæй, Хуссар Ирыстоны президент æмæ Хицауады хæрзиуджытæй, фæлæ йæ сæйраг хæрзиуæгыл нымайы йе ‘нгом бинонтæ æмæ адæмы хæлар цæстæнгас. Фембæлды нысан уыдис Мерабы ног чиныджы рауагъдимæ баст.
«В диалоге с собой» у авторы æртыккаг чиныг. Хъæздыг ирон æмæ уырыссаг æвзагыл фыст æрмæджыты автор дзуры йæ миддунейы равзæрдыл, патриотизмыл, фæсивæды хъомыладыл, хицæн ныхас кæны Уæрæсе æмæ Ирыстоны бастдзинадыл, уарзондзинады æнкъарæнтæн дæр дзы разынд бынат. Сфæлдыстадон изæры кастысты Мерабы æмдзæвгæтæ, зарыдысты Дауыраты Эдуард, Гуыцмæзты Георги, Дзахоты Зæлинæ æмæ иннæтæ. Уыдысты дзы кадджын уазджытæ, æхсæнадон архайджытæ, культурæйы минæвæрттæ, йе ‘мцæдисонтæ æмæ æмбæлттæ Хуссарæй, Цæгатæй.
Бæрæгбон амыдтой нæ республикæйы адæмон артист Цæриаты Валери æмæ Хуссар Ирыстоны национ чиныгдоны директор, зарæггæнæг Гуыцмæзты Иннæ.
Йæ зынаргъ уазджытæн Мераб зæрдæбын арфæ ракодта æмæ загъта, йæ ног чиныджы сæйраг темæ баст кæй у нæ ныхмæлæуд дунейы æргом ныхас хи зæрдæимæ акæнынимæ.
– Чи стæм, кæцæй æрбацыдыстæм, кæдæм цæуæм, нæ фыдæлты хъуыды кæнгæйæ, ма рох кæнæм, нæ фидар цæджындз кæй у фыдыбæстæ æмæ адæммæ уарзондзинад. Мæ алы æмдзæвгæйы дæр дзурын Хуыцауимæ, ирон адæмы историимæ. Æрвылбоны куысты, хъуыддаджы фембæлдтыты, фæндæгтыл цæугæйæ, ныры рæстæг æнцон у дæ миддунеимæ бастдзинад фесафын. Ме сфæлдыстад у мæхиимæ ныхас. Афтæ равзæрдис чиныджы сæргонд. Алы æмдзæвгæ дæр у кæнæ мæхимæ фарста, кæнæ та – дзуапп. Мæ зæрдæмæ хæстæгдæр сты нæ историйы риссагдæр сыфтæ, нæ фарсмæ чи нал ис, фæлæ сæ ном рох кæмæн нæ уыдзæн, уыцы мысинæгтимæ баст æмдзæвгæтæ, – загъта Зассейы-фырт æмæ фæнысан кодта, æртыккаг чиныг кæй у кæддæры æрыгон æмæ абоны фæлтæрдджын адæймаджы æвдисæн.
Сфæлдыстадон цæхæр кæцæй исыс, зæгъгæ, йæ куы бафарстой, уæд загъта: «Мæ бинонтæ, ме ’мбæлттæ æмæ фæндагæй, уæлдайдæр та Цхинвал æмæ Дзæуджыхъæуы ’хсæн царды фæндагæй, райгуырд бирæ лирикон æмдзæвгæтæ». Ныртæккæ дæр рауагъдады ис йæ куыстыты æмбырдгонд, сæ фылдæр – ирон æвзагыл.
Нæ республикæйы Фысджыты цæдисы правленийы сæрдар Хозиты Барисы хъуыдымæ гæсгæ, фæстаг азты ахæм аив арæзт чиныг нæма рацыд мыхуыры. Алцыдæр дзы ис йæ бынаты – райдай чиныджы цъарæй æмæ кæронбæттæнæй фæу.
– Дызæрдыггаг нæу, Сочийы цы чингуыты конкурс ис, уым уæлахиздзау кæй суаид йæ хæрзхъæддзинадмæ гæсгæ, уый, – загъта Барис æмæ стыр аргъ скодта æрмæджытæн, æнцон кæсæн кæй сты, рæсугъд æмæ хъæздыг литературон æвзагæй фыст.
– Æз поэт нæ дæн, æмæ Мерабы сфæлдыстадæн, куыд профессионал, афтæ аргъ кæнын мæ бон нæу, фæлæ, куыд хуымæтæг кæсæг, æхсызгондзинад райстон йе ‘мдзæвгæтæй, – чиныджы авторæн зæрдиаг арфæ кæнгæйæ, загъта профессор Цыбырты Людвиг.
Дзидзойты Валери, историон наукæты доктор, чиныгæн ныффыста разныхас.
– Стыр курдиаты хицау дæ, дæ хъуыдытæ хицæн кæнынц иннæ поэтты ’хсæн. Хуыцау зæгъæд, æмæ дæ фыдæбæттæн аккаг аргъгонд куыд æрцæуа, – загъта профессор.
Зассеты Мерабæн арфæ ракæнынмæ Хуссар Ирыстонæй æрцыд æнæхъæн минæварад. Уыдоны номæй загъта «Россотрудничество»-йы разамонæг Сергей Комиссаров.
– Ирыстон у стыр Уæрæсейы иу хай, æмæ, цалынмæ Мерабы хуызæн, рæзгæ фæлтæрæн фæзминаг æцæг ирон лæгтæ уа нæ фарсмæ, уæдмæ нæ бастдзинад фидардæр кæндзæн, – загъта Комиссаров.
Æппæтадæмон æхсæнадон палатæйы сæрдар Александр Ольшанский видеобастдзинады фæрцы арфæ ракодта бæрæгбоны архайджытæн.
Зассеты Мераб Евразийы адæмты культурон бынтæ бахъахъхъæнынмæ аккаг æвæрæн кæй бахаста, нациты ’хсæн культурон бастдзинæдтæ кæй фидар кæны, рæдаудзинад æмæ рæсугъддзинады идеалтыл кæй дзуры, уый тыххæй йын саккаг кодтой Евразийы культурæ æмæ аивады кадджын кусæджы ном.
Сфæлдыстадон изæр уæлдай сфидыдта, Мераб йæхæдæг куыд зæрдæмæхъаргæ кастис поэтикон æмбырдгондæй йæхи æмдзæвгæтæ, уымæй.
Джиоты Аленæ
