Дунеон равдыст PRO «ЯБЛОКО-2026» йæ куыст фæци, æмæ ма иу хатт дæр нæ бон зæгъын у, хъæууон хæдзарады къабазы сæйраг фæзуат кæй у.
Мадзалы егъаудзинадыл дзурæг у, 15 паддзахадæй йæм делегацитæ кæй æрбацыд, йæ экспозицийы фæзуат уыд ссæдз мин квадратон метры, архайгæ та дзы кодта авд мин адæймагæй фылдæр.
Цæгат Ирыстоны стенды æвæрд уыдысты нæ республикæйы агропромышленнон комплексы æнтыстдзинæдтæ æмæ гæнæнтæ, æмæ равдысты архайджытæ семæ цымыдисæй зонгæ кодтой.
Нæ регионы хъæууон хæдзарады къабазы куыстуæтты минæвæрттæ базонгæ сты иннæ регионтæй равдысты архайджытимæ, кæрæдзийы сæ фæлтæрддзинадæй фæхайджын кодтой, сæвзæрдысты дзы æмгуыстад æмæ хæлардзинады тæгтæ. Ахсджиаг ныхас цыди тыллæгæрзад фæбæрзонддæр кæныныл, зайæгойты алы низтæй бахъахъхъæныны мадзæлттыл, продукци-
йыл бакуысты гæнæнтыл. Уæлдай æргом равдысты архайджытæ аздæхтой нырыккон ног технологитæй пайда кæныны гæнæнтæм.
Нæ республикæйы стенды хъæздыгдзинад æхсызгонæй бавдыстой Хъæууон хæдзарады министрад æмæ регионы раззагдæр агропромышленнон куыстуæттæ равдыстыты центр «МинводыЭКСПО» -йы. Хицæнæй дзы æвæрд уыд куыстуат «Казачий хутор»-ы стенд – уый ныссагъта 1000 гектары фæткъуы бæлæстæ æмæ сарæзта, 50 мин тоннæйы кæм цæуы, ахæм æвæрæнтæ (хранилище). Йæ продукцийы хæрзхъæддзинад рагæй бæрæг кæмæн у, уыцы куыстуæттæ «Де-Густо», «Аланийы æхсæр», «Дельта», «Полезнотека», «Агропремиум», фермерон хæдзарæдтæ дæр сæ зæрдæтæ барухс кодтой равдысты архайджытæн. Стæй æрмæст сæ куысты фæстиуджытæй нæ – ирон чъириты ад, куыд фæзæгъынц, уазджыты дзыхы баззад. Цы æгъдау ныффидар, уымæ гæсгæ сын зæрдиаг æгасцæуай загътой нæ республикæйы Хицауады Сæрдар Дзанайты Барис æмæ хъæууон хæдзарады министры хæдивæг Къадзаты Игорь.
Дзанайты Барис куыд фæбæрæг кодта, афтæмæй Цæгат Ирыстоны агропромышленнон комплексы стыр æргом здæхт цæуы дыргъдæттæ рапарахат кæныныл. Республикæйы Сæргълæууæг Сергей Меняйлойы уынаффæмæ гæсгæ, регион алы программæты архайы, æмæ ныридæгæн къабазы рæзт бæрæг у. Æрвылаз дыргъдæтты фæзуат кæй рæзы, уый руаджы 2030 азмæ фондз мин гектарæй фæфылдæр уыдзæн, сæйраг культуртæ – фæткъуы, кæрдо, чылауи, æхсæр, бал, алыхуызон мæнæргъытæ. Ныридæгæн республикæйы ис нырыккон хъæрмуæттæ промышленнон дыргъдæттимæ.
Стыр æргом здæхт цæуы сæнæфсиры куыстгæнæн къабазмæ дæр. Иу дзырдæй, кæдæм ма рæза нæ республикæйы агропромышленнон комплекс, уый ис.
ГАПБАТЫ Алетæ
