Республикæйы Сæргълæууæг Сергей Меняйло Медицинон кусæджы кадæн конд бæрæгбоны схорзæхджын кодта сгуыхтдæр дохтырты æмæ медицинон хоты. Евгений Вахтанговы номыл уырыссаг академион театры РЦИ-Аланийы разамонæг медицинон æппæт кусджытæн раарфæ кодта сæ бæрæгбоны фæдыл.
Куыд фæбæрæг кодта, афтæмæй медицинæйы фæндаг равзарджытæ удæй вæййынц фидар, дæсныйадыл – æнувыд, фæллойуарзаг, алы бон дæр адæймаджы мæлæты дзæмбытæй ратоныныл фæтох кæнынц.
«Ныртæккæ æнæниздзинад хъахъхъæнынад размæ цæуы, фæзынд бирæ ног технологитæ, медицинон лæггæдты нымæц рæзы. Ацы ран æнæнхъæлæджы адæм нæ разыны, уыдон вæййынц, сæ фидæн рынчынтæн чи снывонд кæны, ахæмтæ. Сымахæй алчидæр архайы, цæмæй рынчынæн баххуыс кæна, сæ рыст сын уæ зæрдæты бауадзынæввонг вæййут. Алкæмæдæр уæ ис хи зындзинæдтæ, фæлæ уæддæр рынчынтæн уæ удты хъарм дæттут, бузныг уын уый тыххæй», – загъта Сергей Меняйло.
Æнæниздзинад хъахъхъæнынады стыр сгуыхтыты æмæ Уæрæсейы медицинæйы рæзтмæ стыр бавæрæны фæдыл Александр Реутов хорзæхджын æрцыд «Æнæниздзинад бахъахъхъæнынæн ахъаз кæнын»-ы майданæй. «Цæгат Ирыстоны сгуыхт дохтыр»-ы нæмттæ лæвæрд æрцыдысты Абайты Мæдинæ, Бицъаты Ольгæ, Джериаты Фатимæ, Зæнджиаты Елизаветæ, Мæхæмæтты Дзерассæ, Валентина Пироженко, Тамара Ровнова, Вячеслав Русецкий, Тауаситы Валерия, Туаты Маринæ Цæгæраты Сослан æмæ иннæ дохтыртæн.
Горæтгæрон районы рынчындоны хистæр медицинон хо Гаглойты Фатимæ ссис «РЦИ-Аланийы æнæниздзинад хъахъхъæнынады сгуыхт кусæг». Республикæйы æмвæзады æндæр хорзæхтæ райстой медицинон къабазы дохтыртæ æмæ медицинон хотæ.
