Дзæуджыхъæуы РЦИ-Аланийы Национ музейы равдыстыты залы (раздæр ацы ран уыд тамакоты фабрик, дардта йæ Евгений Вахтанговы фыд) уыд «Вахтангов. Путь домой», зæгъгæ, Æппæтуæрæсеон æртыккæгæм театралон фестиваль саразыны фæдыл пресс-конференци.
Йæ архайджытæ уыдысты: РЦИ-Аланийы культурæйы министр Гуыдиаты Батрадз; Цæгат Кавказы федералон зылды ВТБ-банчы разамонæг, Банк ВТБ-йы вице-президент (ацы банк у фестиваль саразджытæй иу) Александр Дыренко; Евгений Вахтанговы номыл паддзахадон академион театры директор – Уæрæсейы аивæдты сгуыхт кусæг, Уæрæсейы Хицауады Премийы лауреат Кирилл Крок; «Вахтангов. Путь домой»-йы фестивалы директор – Санкт-Петербурджы Хицауады Фæсивæдон премийы лауреат Алексей Никитин; Евгений Вахтанговы номыл Академион уырыссаг театры аивадон разамонæг – Уæрæсейы адæмон артист, РЦИ-Аланийы адæмон артист, Хетæгкаты Къостайы номыл Паддзахадон премийы лауреат, Уæрæсейаг национ театралон преми «Золотая маска»-йы лауреат Владимир Уваров.
Пресс-конференци амыдта сфæлдыстадон фарстаты фæдыл Евгений Вахтанговы номыл Паддзахадон академион театры директоры æххуысгæнæг, фестивалы эксперт, профессор, аивадзонынады доктор Дмитрий Трубочкин.
Йæ разныхасы куыд загъта, афтæмæй, Вахтанговы хæдзар куы байгом æмæ йæ хуыз куы скалдта, стæй, йæ номыл фестиваль Цæгат Ирыстоны арæзын куы райдыдтой, уæдæй фæстæмæ Дзæуджыхъæу ссис æппæт Цæгат Кавказы культурон центр.
Уазджытæ æмæ фестиваль аразджытæн зæрдиаг арфæ ракодтой республикæйы культуæйы министр Гуыдиаты Батрадз æмæ Владимир Уваров. «Фестиваль арæзт кæдæй цæуы, уæдæй Дзæуджыхъæуы уазджыты нымæц зынгæ фæфылдæр. Алкæйы дæр фæнды, фестиваль цы бонты цæуы, раст уыцы бонты Дзæуджыхъæу бабæрæг кæнын», – загъта министр.
Вахтанговы номыл фестивалы сæйраг темæ баст у, нæ бæстæ ацы аз кæй бæрæг кæны, Уæрæсейы адæмты иудзинады уыцы темæимæ, уымæ гæсгæ дзы архайдзысты дыууæ федералон театры – Федор Волковы номыл театр Ярославлæй, Мæскуыйы фæсивæдон театр æмæ Сергей Образцовы номыл Куклаты паддзахадон академион театр, стæй Адыгейы Республикæйы И.С. Цейы номыл Национ театр Майкъопæй.
Спектакльтæ ацæудзысты Дзæуджыхъæуы уырыссаг академион театры, ирон академион театрты æмæ Мариинаг театры филиалы сценæтыл.
Программæйы куыд амынд ис, афтæмæй фестиваль арæзт у æртæ хайæ: сæйраг программæйæ – фенæн уыдзæн уæлдæр амынд театрты спектакльтæ; ахуырадон программæйæ – фестивалы уазджытæн сæ бон байхъусын уыдзæн, аивадзонынады дæснытæ, продюссертæ æмæ режиссертæ Марина Райкина, Дмитрий Трубочкин, Вадим Верник, Валентина Федорова, Вадим Щербаков, Марина Токарева æмæ, иннæтæ цы цымыдисаг лекцитæ бакæсдзысты, уыдонмæ; кæронбæттæн хайы республикæйы цæрджытæ æмæ уазджытæн фестиваль саразджытæ бацæттæ кодтой диссаджы концерт. Раздæры азтау уый арæзт æрцæудзæн Дзæуджыхъæуы Сæрибары фæзы. Стæй, раздæрау, фестиваль райдайдзæн, нæ республикæйы сæйраг горæты уæнгтæм фестивалы архайджытæ, уазджытæ, æрцæуæг театртæ æмæ йæ цæрджытæ кæй агуылф кæндзысты æмæ сыл рæсугъд, цымыдис æмæ хъæлдзæгæй кæй ацæудзысты, уымæй.
Æппæтуæрæсеон театралон фестиваль «Вахтангов. Путь домой» фыццаг хатт арæзт æрцыд 2024 азы Дзæуджыхъæуы Евгений Вахтанговы номыл мæскуыйаг театры хъæппæрисæй, стæй РЦИ-Аланийы Хицауад æмæ комкоммæ республикæйы Сæргълæууæг Сергей Меняйлойы æххуысæй. Ацы хатт фестиваль Дзæуджыхъæуы – Евгений Вахтанговы райгуырæн зæххыл ацæудзæн æртыккаг хатт 6 июлæй 12 июлмæ.
Фестивалы организатор у автономон æнæкоммерцион куыстуат «Евгений Вахтанговы номыл Театрæн Æххуыс æмæ йæ райрæзты центр. Техникон æгъдауæй пресс-конференци саразынæн баххуыс кодта акционерон æхсæнад «Ростелеком».
ДЕДЕГКАТЫ Зæлинæ,
къам систа Татьяна ШЕХОДАНОВА
