РЦИ-Аланийы Сæргълæууæг Сергей Меняйлойы разамындæй уыд æмбырд цæрæнуатон-коммуналон хæдзарады фарстаты фæдыл.
Боны фæткы уыдис хъæбæр коммуналон æппарæнтимæ сæвзæрд уавæр: æфснайын æмæ бырон ласын кæуыл фæдзæхст у, уыдон сæ контракттæ ныртæккæ куыд æххæст кæнынц, контейнерты фæзтæ цавæр уавæры сты æмæ уыцы куыстуæттæ хъæугæ техникон фæрæзтæй куыд ифтонггонд сты, уый.
Сергей Меняйло бахæс кодта комплексон æгъдауæй æркæсын, æфснайын æмæ бырон ласыны куыст чи кæны, уыцы организациты архайдмæ, сбæлвырд кæнын, сæхимæ райст хæстæ æххæст кæнынæн сæрмагонд техникон фæрæзтæ, кадртæ æмæ куысты гæнæнтæй куыд ифтонг сты, уый
Æмбырды архайджытæ æркастысты районты æхца фидыны фарстамæ дæр. Муниципалон скондты сæрдартæн хæсгонд æрцыд æппæт мадзæлттæ саразын хъæбæр коммуналон æппарæнтæ ласыны хæстæ бафидын.
Иннæ радон æмбырдмæ муниципалитеттæ хъуамæ бацæттæ кæной бæрæггæнæнтæ, цы контейнертæ балхæдтой æмæ сæ сæвæрынмæ цал фæзы сарæзтой, стæй ма сæ уæлæмхасæн цал балхæнын хъæуы, уый тыххæй. Уыцы куысты руаджы сбæрæг уыдзæн, кæм сæвæрын хъæуы уыцы уæлæмхасæн контейнертæ, цæмæй цæрджытæн сæ бырон æмбырд кæныны системæ фæрогдæр уа.
Æмбырды архайджытæ ма æрныхас кодтой хъæбæр коммуналон æппарæнтимæ кусæн нырыккон комплекс саразыныл дæр. Пъланмæ гæсгæ, бырон хицæнгæнæн (сортировочный) комплекс хъуамæ кусын райдайа ацы аз. Уый республикæйы быронимæ куыст ног æмвæзадмæ сисдзæн, фæфылдæр уыдзæн хицæнгонд быроны куысты (переработка) бæрц, æмæ уымæй фæхуыздæр уыдзæн экологион уавæр.
– Хъæбæр коммуналон æппарæнтимæ куыст хъуамæ цæуа иудадзыг, æнæкъуыхцытæй. Æмбарын хъæуы, чи æмæ цæуыл дзуапп дæтты, контракттæ куыд æххæстгонд цæуынц, техникæ æмæ сæм кусджытæ фаг ис, æмæ ма сæ цавæр фарстатæ тыхсын кæнынц, уыдæттæ, – загъта Сергей Меняйло.
РЦИ-Аланийы Сæргълæууæг æмæ Хицауады пресс-службæ
