Цæгат Ирыстоны паддзахадон университеты экономикæ æмæ разамынды факультеты маркетинг, менеджмент æмæ туризмы кафедрæйы ассистент Вячеслав Санников фæуæлахиз «Росмолодежь»-ы дунеон проект «Проводники смыслов. Экскурсоводы»-йы.
Конкурсмæ не ’мзæххон бавдыста зындгонд фыссæг Михаил Булгаковы райгуырды 135 азы кадæн арæзт фыццаг цæгаткавказаг иммерсивон гастрономон спектакль-балц «Булгаков. Начало». Президенты культурон фæндæтты хайады æххуысæй проект баххæст кодта Цæгат Ирыстоны Экскурсиамонджытæ æмæ гидтæ-тæлмацгæнджыты ассоциаци. Вячеслав Санников у ассоциацийы президент.
Экскурси, театралон архайд æмæ фыссæджы дуджы гастрономон авналæнтæ спектакль-балцы баиу сты, Михаил Булгаковы цард æмæ сфæлдыстадимæ баст чи у, балц цæуы Дзæуджыхъæуы фондз ахæм ахсджиаг бынаты: Дзæуджыхъæуы историон музей, Булгаковты бинонтæ фатер кæм баххуырстой, Маяковскийы уынджы 9-æм хæдзар, фыссæджы цыртдзæвæн, Гæздæнты Гайтойы номыл фæсивæдон чиныгдон, стæй Евгений Вахтанговы номыл Уырыссаг академион театр. Экскурсийы рæстæг балцы архайджытæ базонгæ сты, Булгаков Дзæуджыхъæуы цы азтæ равдыста, йæ царды уыцы хаимæ, стæй рагон амынддзинæдтæм гæсгæ конд ирон хойраг ацахуыстой.
Амынд проект арæзт у экскурсион хъуыддаджы райрæзты фæрцы Уæрæсейы адæмты иудзинад фæфидар кæнынмæ, стæй, фæсивæд нæ бæстæйы адæмты æгъдæуттæн кад цæмæй кæной, уымæ.
Конкурсон фæлварæн æнтыстджынæй раттæг Вячеславы æрбахуыдтой Смоленскы рæстæг проекты комкоммæ хайы архайынмæ. Не ’мзæххонæн йе ’нтыстдзинады фæдыл зæрдиаг арфæ кæнæм.
ЦИПУ-йы пресс-службæ
