Алагиры Барахъты Гинойы номыл библиотекæйы къулыл кадджын уагæй байгом кодтой зындгонд æфсæддон разамонæг, Советон Цæдисы Хъæбатыр, инæлар-лейтенант Иван Рослыйы номарæн фæйнæг.
Ацы адæймаджы ном сæнусон кæныны фæндон бахаста нæ бæстæйы Хæстон-историон æхсæнады уæнг, педагогон наукæты кандидат, æппæтуæрæсеон проект «Россия#Юг#Победа#Помним»-ы разамонæг Павел Беккерман.
Кадджын æмбырды архайдтой районы администрацийы сæргълæууæг Демыраты Вячеслав, йæ хæдивæг Æгъуызарты Хетæг, Алагиры сæргълæууæг Фардзинты Хадзыбатыр, Павел Беккерман, проектмæ цæстдарæг Татьянæ Беккерман, мидхъуыддæгты хайады кусджытæ æмæ æндæртæ.
Библиотекæйы кусæг, историон клуб «Истоки»-йы разамонæг Лаурæ Касимова, æмбырды архайджытæн раарфæ кæнгæйæ, Иван Рослыйы цардвæндаджы тыххæй цыбыр хабæрттæ радзырдта. Амынд цауы ахадындзинад бафиппайгæйæ, Павел Беккерман куыд загъта, афтæмæй хæсты заман размæбырсæн пъланыл кусыны рæстæг Иван Рослыйы командон бынат уыд Джызæлæй километр æддæдæр ран, инæлар йæхæдæг та рæстæгмæ цард Алагиры. Инæлары хæдтулгæ арæх цыд Алагиры фæндæгтыл, Дзуарыхъæуæй Алагирмæ фæндагыл цыды рæстæг та знаджы хæдтæхджытæ Рослыйы хæдтулгæ дыууæ хатты фехстой (ууыл дзурæг сты документалон æвдисæнтæ).
– Инæлар Рослыйы фыццаг ирыстойнаг номарæн фæйнæг Алагиры кæй байгом, ацы горæты цæрæг адæм уымæй хъуамæ сæрыстыр уой. Нæ бæстæйы æппæт Хъæбатырты нæмттæ хъахъхъæнинаг сты, – загъта проекты разамонæг.
Павел Беккерман йæ раныхасы кæрон бынæттон библиотекæйæн балæвар кодта Иван Рослыйы фыст чингуытæ «Последний привал в Берлине» æмæ «Выстоять и победить».
Районы администрацийы сæргълæууæджы уынаффæгæнæг Гæбуты Юрийы ныхасмæ гæсгæ, 1939-1940 азты финнаг хæсты заман майор Рослыйы стратегион курдиат раргом. Иван Рослый кæй командир уыд, уыцы 245-æм фистæгæфсæддон полкъ знаджы фидæрттæ батыдта æмæ афтæмæй Сырх æфсады иннæ дæлхайæдты размæбырстæн фадæттæ сарæзта. Дæсны хæстон архайды тыххæй Рослыйæн саккаг кодтой Советон Цæдисы Хъæбатыры кадджын ном.
1942 азы ноябры райдайæны Рослыйы разамындæй 11-æм гвардион фистæгæфсæддон корпус знаджы æфсады размæбырст баурæдта. Иттæг дæсны уагæй кæй бацæттæ кодтой, уыцы хæстон операцийы фæрцы знаджы æфсæдтæ Цæгат Кавказæй фæстæмæ ацыдысты. «Рослыйы операци», зæгъгæ, афтæ кæй схуыдтой, уыцы хæстон операци бахастой æфсæддон ахуыргæнæн чингуытæм æмæ йæ амонынц æфсæддон академиты.
Æрæджы Алагиры Минæвæртты æмбырд инæлар-лейтенанттæ Иван Рослый æмæ Александр Ворожищевæн ратта Алагиры кадджын граждæнты нæмттæ (адзалы
фæстæ).
Гæззаты Зæринæ
