РЦИ-Аланийы Сæргълæууæг Сергей МЕНЯЙЛО амыдта республикæйы Хицауады аппаратон æмбырд. Министрадтæ æмæ ведомствæты разамонджытимæ ныхас уыд ивгъуыд къуырийы бæрæггæнæнтыл æмæ фидæны ног нысантыл.
Республикæйы оперативон уавæры тыххæй доклад бакаст Граждайнаг хъахъхъæнынады æмæ æнæнхъæлæджы уавæрты хъуыддæгты фæдыл Комитеты сæрдар Александр Хоружий.
– Ивгъуыд къуырийы дæргъы Цæгат Ирыстоны æнæнхъæлæджы уавæртæ бæрæггонд не ’рцыд. Республикæйы фæндæгтыл амынд рæстæгмæ æрцыд 76 фæндаггон фыдбылызы. Хъыгдард дзы баййæфтой 21 адæймаджы, æмæ сæ æвæстиатæй рынчындонмæ аластой. Донивылдтытæ æмæ дурзæйы аххосæй Транскамы фæндаг æхгæд у æппæт автотранспорты хуызтæн дæр. Арвыкомы фæндагыл ацæуыны бар ис æппæт автотранспорты хуызтæн дæр. Уæрæсейы Федераци æмæ Гуырдзыстоны арæныл ивгъуыд къуырийы дæргъы дыууæрдæм ахызтызты 27 мин автотранспортон иуæджы æмæ 93 мин адæймагæй фылдæр. Барадхъахъхъæнæг оргæнтæ, республикæйы цы 156 фыдракæнды æрцыд, уыдонæй раргом кодтой 89. 10 æмæ 11 июлы республикæйы тæссаг уыд æнæтæхæг аппараттæй. Бæрнон ведомствæтæ бæрæг кæнынц, нефть æмæ артаг республикæмæ цас хæццæ кæны, уый. Нефтебазæ «Роснефть» æмæ «Газпром»-ы бензины бæрц у 3628 тоннæйы, 2452 тоннæйы – дизелы артаг. Ноджы ма фæндагыл сты 960 тоннæйы бензин «Роснефть»-æн, 840 тоннæйы – «Газпром»-æн æмæ 893 тоннæйы дизелы артаг, – фехъусын кодта Александр Хоружий.
Цæгат Ирыстоны Æнæнхъæлæджы уавæрты министрады хъусынгæнинагмæ гæсгæ, уарынты аххосæй дарддæр дæр тæссаг у донивылдтытæ æмæ дурзæйтæ рацæуынæй. Бæрæггонд цæуы цæугæдæтты доны бæрзæнд.
Сергей Меняйло профилон ведомствæтæн бафæдзæхста, цæмæй республикæйы артаджы æргътæ бæрæг кæной æмæ уавæрмæ сæ цæст дарой. Йæ ныхасмæ гæсгæ, уæлдай æргом аздахын хъæуы, тагъд æххуысы службæ, коммуналон хæдзарад æмæ хъæууон хæдзарад хор æфснайыны рæстæг артаг хъуаг куыд нæ баййафой, уымæ. Ноджы ма «Роспотребнадзор»-ы Цæгатирыстойнаг хайæн бафæдзæхста, хицæн адæймæгты къухы цы заправкæтæ ис, уым сбæрæг кæнын бензины хæрзхъæддзинад.
Дарддæр регионы разамонæг арфæ ракодта Мидхъуыддæгты оргæнтæ, Уæрæсейы гварди, ЧОП æмæ иннæ ведомствæтæн, Æппæтуæрæсеон фестиваль «Вахтангов. Путь домой» æдасæй кæй ахæццæ кæронмæ, æгъдаухæлд æмæ дзы фыдбылызтæ кæй не ’руагътой, уый фæдыл.
Аппаратон æмбырды Цæгат Ирыстоны ахуырад æмæ наукæйы министр Алыбегты Эллæ фехъусын кодта, фыццæгæм къласмæ бацæуыны 6,5 мин курдиаты кæй райстой, уый. Ноджы ма, йæ ныхасмæ гæсгæ, скъолаты автопаркыл бафтыд 27 ног автобусы.
Сергей Меняйло Алыбегты Эллæйæн бахæс кодта республикæйы профилон кълæстæ байгом кæнын. Инженерон, медицинон, педагогон, кадетон æмæ æндæр къабæзтæ хъуамæ фæзыной алы скъолайы дæр.
Æмбырды ма ныхас уыд, алы рæстæджыты æнæзакъонæй республикæйы зæххытæ уæйгонд кæй æрцыдысты, ууыл. Сергей Меняйло профилон ведомствæтæн бахæс кодта Дзæуджыхъæуы бынæттон администраци æмæ прокуратурæйы æххуысæй сбæрæг кæнын, Мидæгрæбинаг цады алыварс цы зæххытæ ис, уыдон 49 азмæ арендæйы кæмæн лæвæрд æрцыдысты, уый.
Республикæйы Сæргълæууæг бафæдзæхста РЦИ-Аланийы паддзахадон æвзæгты тыххæй закъоны проект республикæйы Парламентæй раздахын. Йæ ныхасмæ гæсгæ йыл нырма хъæуы бакусын.
– Уыцы закъон æхсæнад хъуамæ иу кæна, хицæн нæ, фæлæ. Фыццаджыдæр, хъуамæ арæзт цæуа республикæйы конституци æмæ федералон закъонады бындурыл, – загъта Сергей Меняйло.
Æмбырды ныхас кодтой æндæр ахсджиаг фарстатыл дæр.
ХЪОЙБАЙТЫ Галинæ
