РЦИ-Аланийы Сæргълæууæг Сергей МЕНЯЙЛОЙÆН кусæг фембæлд уыд Цæгат Кавказы федералон университеты ректор, профессор Татьяна ШЕБЗУХОВАИМÆ. Уый ацы аз уыд дыккаг фембæлд æмгуыстады фæдыл. Ныхас сæйрагдæр цыд наукон æмæ ахуырадон проекттыл Цæгат Ирыстоны уæлдæр ахуырадон уагдæттимæ Цæгат Кавказы уæлдæр ахуыргæнæндæтты æмгуыстады фæлгæты.
– Нæ бæстæйы раззагдæр уæлдæр ахуыргæнæндæттимæ, ахæм у ЦКФУ дæр, æмгуыстад, – хорз фадат у нæ респуб-ликæйæн дæсны специалисттæ цæттæ кæныны хъуыддаджы, наукон базæ фидардæр кæнынæн, ахсджиагдæр къабæзты нырыккон мадзæлттæй пайда кæнынæн, уыдонимæ – агропромышленнон комплекс æмæ туризмы дæр. Уымæ гæсгæ, алкæддæр цæттæ стæм æмгуыстадмæ, æмæ нæ уырны, регионæн уый стыр пайда кæй æрхæсдзæн наукæйы рæзт æмæ кадртæ цæттæ кæныны хъуыддаджы дæр, – загъта Сергей Меняйло.
Цæгат Кавказы федералон университеты хъæппæрисæй цы æмгуыстадон къорд арæзт æрцыд, уырдæм Цæгат Ирыстонæй бацыдысты 4 раззагдæр уæлдæр ахуыргæнæндоны: Цæгат Ирыстоны Хетæгкаты Къостайы номыл паддзахадон университет, Цæгат Кавказы хæххон-металлургон институт, Хæххон паддзахадон аграрон университет æмæ Цæгат Ирыстоны паддзахадон медицинон академи.
– Мах фæнды Цæгат Кавказы уæлдæр ахуыргæнæндæтты æмгуыстады къорды куыст рацаразын. Цæгат Кавказы федералон университет цæттæ у йæхимæ ахæм хæс райсын, наукон æмæ академион æхсæнадæн пайда цы мадзæлттæ уыдзысты, уыдон аразын. Фæнды нæ стыр бавæрæн бахæссын федералон зылды экономикон рæзтмæ. Уый тыххæй та нæ хорз æмбарын хъæуы, æмгуыстады къорды архайджытæ чи сты, сæ авналæнтæ æмæ гæнæнтæ, сразæнгард сæ кæнын ног проекттæ саразынмæ, рæзт æмæ фæлтæрддзинады бындур сбæрæг кæнын æмæ дзы кæрæдзийæн бахай кæнын, – фæбæрæг кодта Татьяна Шебзухова.
Цæгат Ирыстоны Цæгат Кавказы федералон университеты минæвæрттæ бабæрæг кодтой республикæйы уæлдæр ахуыргæнæндæттæ, базонгæ сты æмгуыстады рæзты проекттимæ туризм, биотехнологи æмæ æндæр къабæзты. Æрныхас кодтой инженерон ахуырад æмæ наукон-техникон æмгуыстады фарстатыл Цæгат Ирыстоны Хетæгкаты Къостайы номыл паддзахадон университеты. Хæххон паддзахадон аграрон университеты разамындимæ ныхас кодтой агрокълæсты рæзтыл.
Уæ зæрдыл уын æрлæууын кæндзыстæм: Цæгат Кавказы уæлдæр ахуыргæнæндæтты æмгуыстады къорд «Человеческий капитал и новая экономика для полиэтничных регионов» арæзт æрцыд 2021 азы Цæгат Кавказы федералон университеты хъæппæрисæй Цæгат Кавказы федералон зылды Уæрæсейы Федерацийы Президенты Æххæстбарджын минæвары æххуысæй.
ХЪОЙБАЙТЫ Галинæ
