Цæгат Ирыстоны паддзахадон университеты психологон-педагогон факультеты фыццагкурсонтæ республикæйы æрдзон-бæстыхъæдон уавæртæ иртæстой быдырон практикæйы рæстæг. Базонгæ сты метеорологты архайдимæ, æрдзон объекттæ федтой, теорион зонындзинæдтæ практикæйы сфидар кодтой.
Практикæ баст уыд райгуырæн бынаты æрдз бæлвырд базонынимæ, йæ биологон хицæндзинæдтæ раиртасынимæ, экологон дунеæмбарынад фидар кæнынимæ. Практикæйæн разамынд лæвæрдта биологон наукæты кандидат, педагогон ахуырады кафедрæйы доцент Лариса Бобылева. Практикæйы рæстæг студенттæ бабæрæг кодтой горæты метеостанцæ, специалистты куысты сусæгдзинæдтæ базыдтой, нырыккон приборты фæрцы боны ахастмæ цæст дарæн куыд ис, уый бамбæрстой. Сæйрагдæр уыд, Дзæуджыхъæу æмæ Цæгат Ирыстонæн боны ахаст куыд саразынц, уый.
Уымæй уæлдай ма сæ базонгæ кодтой, незамантæй нырмæ чи ‘рхæццæ, уыцы палеонтологон цавддуртимæ. Сæмбырд сæ кодта метеостанцæйы кусджытæй иу. Фидæны педагогтæ базыдтой топографион бынæттæ исын, Фæскомцæдисон парчы сæйраг аллейы пълан сарæзтой, Хетæгкаты Къостайы номыл парчы культурон фенддаг бынæттæ фæбæрæг кодтой. Уыдон хаст сты Цæгат Ирыстоны ботаникон цыртдзæвæнты хыгъдмæ. Доны станцæйы доны экохыз рабæрæг кодтой.
Практикæйы фылдæр рæстæг арвыстой Цъæй æмæ Куырттаты кæмтты, федтой рæсугъддæр бынæттæ. Бамбæрстой, уæлвæзмæ хизгæйæ, æрдзон фæзындтытæ куыд ивынц, уый. Æрдзон цырт-дзæвæнтимæ базонгæ сты, республикæйы зæрдылдарæн бынæттæм дæр фæхæццæ сты. Уыдонимæ – Дзывгъисы фидар. Уыцы балцыты æмбырд кодтой гербаритæ æмæ этномологон æрмæг.
Студентты ныхасмæ гæсгæ сын практикæ райгуырæн бæстæйы рæсугъддæр æмæ ахадгæдæр бынæттæ феныны фадат ратта.
Цæгат Ирыстоны паддзахадон университеты пресс-службæ
