Цхинвалы Сывæллæтты сфæлдыстадон галуаны йæ куыст райдыдта сæрдыгон фæлладуадзæнзæбæхгæнæны фыццаг рад. Сабиты галуан хуыйны «Фидæн», вæййынц дзы боныгон.
Сывæллæттæ 7 азæй 10 азмæ, æмхуызонæй Хуссар Ирыстоны цæрджытæ, афтæмæй дæс боны дæргъы сæ рæстæг æрвитдзысты зæрдæскъæфæн хъуыддæгты, æвæджиауы цауты, фæлладуагъд æмæ уарзон культурæйы арф аныгъуылгæйæ. Рад ахæс-дзæн 24 июлы онг, сывæллæттæ райсдзысты хъæддых ахуырадон, культурон, спортивон зонындзинæдтæ, арæхстдзинæдтæ.
Ног лагеры райсом райдыдта сабиты къордтыл дих кæнынæй, дзæбæх аходæнæй. Бахæрыны хъуыддаг конд у цхинвайлаг 6-æм скъолайы бындурыл. Сабитæ æхсызгонæй саходынц райсомы хæринæгтæй, разæй сæм цы цымыдисаг цаутæ æнхъæлмæ кæсынц, уыдонмæ сæрæнæй ратагъд кæнынц.
Организатортæ куыд зæгъынц, афтæмæй сывæллæттæн ам уыдзæн æртæ хатты бахæрд, сихорыл сæм æнхъæлмæ кæсынц фыццаг, дыккаг æмæ æртыккаг хæринæгтæ. Фæссихор та сын æрцæттæ кæнынц лауызтæ фых джемимæ æмæ сатæг дæттæг кисель. «Аходæн тынг зæрдæмæдзæугæ уыд – пырындз æмæ цай. Мах иумæ бадтыстæм, мæ къордæй уал иу лæппуимæ фæхæлар дæн», – дзуры Сослан.
Сывæллæтты сфæлдыстадон галуаны разамонæг Гуычмæзты Роксанæ куыд радзырдта, афтæмæй сæрдыгон лагеры алы бон дæр бæрæггонд у. «Алы бонæн дæр бацæттæ кодтам программæ, абон уал сабиты къордтыл дих кодтам. Фæсаходæн та сывæллæттæ кæрæдзиимæ зонгæ кодтой, цæттæ кодтой къордты къуымтæ. Æвзæрстой къордты разамонджыты. Уый фæстæ та – сихоры хæрды афон ралæууы, уый фæстæ – сихоры улæфты заман. Афтæ зæгъæн ис æмæ алы хъуыддаг дæр у бæлвырдгонд», – зæгъы директор.
Йæ ныхасмæ гæсгæ, лагеры ис цыппар къорды – «Хуры тынтæ», «Стъалытæ», «Домбайтæ», «Цæргæстæ». Сывæллæттæ сæхи цæттæ кæнынц рад байгом кæнынмæ, къордты «Ныхас»-ы куыстмæ. Æппæты ахсджиагдæр уый у, æмæ сабитæ кæрæдзиимæ базонгæ сты, кæрæдзи базыдтой. «Раздæр никæй зыдтон, фæлæ фæстæдæр базонгæ стæм. Уайтагъд мæ тас фæцыдæр, мæхи тыххæй радзырдтон. Загътон, кафын кæй зонын, нæ къордæй бирæ чызджытæ кафынмæ арæхсынц», – загъта чысыл Камиллæ.
Лагеры программæ афтæ арæзт у, æмæ хъуамæ алы бон дæр сабитæн хæсса ног æнкъарæнтæ, уæлмонцтæ. Æвзонг натуралистты станцæйы дыццæг æмæ цыппæрæмы уыдзысты змæлгæ рæвдз хъæзтытæ. Уымæй уæлдай, сывæллæттæм æнхъæлмæ кæсынц сфæлдыстадон æрмæдзтæ, æндæр ахъаззаг хъуыддæгтæ.
Лагеры фыццаг бонтæ куыд равдыстой, афтæмæй «Фидæн»-ы сабитæ сæ рæстæг æхсызгонæй æрвитынц, вожатыйтæ та сты алыхуызон ногдзинæдтæй дзаг. Разæй сæм æнхъæлмæ кæсынц сфæлдыстадæй, спортæй дзаг бонтæ. Сæйрагдæр та уый у, æмæ ам ссардтой ног хæлæртты.
Къæбысты Роксанæ
