Галаты Барисы номыл дыккæгæм æппæтдунеон музыкалон конкурс «Тропами Галати» уыдзæн ацы фæззæг Хуссар Ирыстоны. Проект царды æххæстгонд æрцæудзæн Уæрæсейы Президенты культурон хъæппæристы фонды гранты фæрцы. Конкурс саразыны фæндон бахаста хъуыстгонд ирон композиторы номыл фонды архайдыл иузæрдион адæймаг – Гергиты Ларисæ.
Ацы азы конкурсон программæ хъæздыг уыдзæн номинацитæй фортепиано, вокал, хъисджын æмæ адæмон инструменттæй. Нырмæ мыхуыры чи нæ рацыд, Галаты Барисы уыцы мысинæгтæ мыуыры рауадзыны фæлгæты арæзт æрцæудзæн уыдонмæ сывæллæтты конд иллюстрациты проект. Адæмон зарджытæ æмбырдгæнæг Ленинграды центрон музыкалон училищæ каст фæуыны фæстæ Галайы-фырт 1931 азы æрцард æмæ куыста Цхинвалы, йæ фæрцы горæты байгом музыкалон училищæ, уыд йæ директор. Фæстæдæр Хуссар Ирыстоны драмон театры куыста оркестры дирижер æмæ сценикон аивады уагдоны директорæй. Сæвæрдта бындур республикæйы паддзахадон ансамбль «Симд»-æн, бирæ рæстæг уыд йæ дирижер æмæ аивадон разамонæг.
Конкурс аразджытæй иу, Галаты Барисы номыл фонды директор Гаглойты Лианæ куыд зæгъы, афтæмæй йæм хуынд æрцæудзысты хъуыстгонд ахуыргæнджытæ æмæ дзырддзæугæ жюри. Фыццаг конкурсмæ фондæн бантыст йæ къухфыстыты дыууæ æмбырдгонды мыхуыры рауадзын, ацы аз октябры та рухс фендзысты, композитор фæндыр æмæ скрипкæйæн кæй ныффыста, уыцы ног æмбырдгæндтæ, стæй раздæр чысыл экземпляртæй чи рацыд, уыдон ногæй джиппы уагъд æрцæудзысты.
Галаты Барисы номыл конкурс арæзт цæуы дыууæ азы иу хатт, ацы хатт ма дзы архайдзысты Новороссийскы Гергиты Ларисæйы номыл музыкалон скъолайы ахуырдзаутæ. Ногиры та нысан кæнынц концерттæй иу бынæттон музыкалон скъолайы арвитын. Конкурсы архайджытæм байхъуыстытæ цæудзысты Цхинвалы Æлборты Феликсы номыл Музыкалон училищæйы. Ныридæгæн та разæнгардæй цæттæ кæнынц конкурсы репертуар.
Хуыбиаты Ларисæ
