Цæгат Ирыстон денджызмæ дæрддзæф у абон, кæд кæддæр нæ рагфыдæлтæ стыр цæугæдæттæ æмæ денджызы был цардысты, уæддæр. Фæлæ, æвæццæгæн, нæ адæмы хъуыдæджы баззад денджызмæ уарзондзинад, æмæ бирæтæ йемæ сæ цард сбастой.
Цæмæй сæ нæмттæ рæстæджы фæлмы ма аныгъуылой, уый тыххæй егъау удуæлдай куыст бакодта не ‘мзæххон, алагираг лæппу Дзарасаты Сергей. Уæвгæ, ныр лæппу нал – 68 азы йыл цæуы. Йæ царды фылдæр æрдæг ратта хæстон-денджызон флотæн, æмæ, куыд фæзæгъынц, зæхх куы ссардта, уæд йæ улæфты рæстæг биноныг куыст бакодта – райдыдта æмбырд кæнын, Ирыстонæй флоты чи службæ кодта раздæр æмæ ныр дæр, уыдоныл æрмæг æмæ дзы чиныг сарæзта. Отставкæйы фыццаг ранджы капитан Дзарасы-фыртæн йæ бинонтимæ ис æнгом бастдзинад. Йæ цардæмбал Колыты Георгийы чызг Зæринæимæ схъомыл кодтой чызг æмæ лæппу.
«Офицеры ВМС – гордость Осетии» мыхуыры рацыд 2025 азы. Йæ фыццаг тиражæй Сергей фæхайджын кодта, чиныгмæ кæй бахаста, уыдонæн сæхи, йе ‘цæг дунемæ дзы чи ацыд, уыдонæн та – сæ бинонты. Чиныджы ссарæн ис хæстон наудзæуджыты – Советон Цæдис æмæ Уæрæсейы Федерацийы афицертыл, Фыдыбæстæйы Стыр хæст æмæ уый фæстæ НАТО-имæ ныхмæлæуды уæззау рæстæджыты лæгдзинад æмæ æхсар, Райгуырæн бæстæйыл иузæрдиондзинад чи равдыста æмæ ныр дæр æвдисы, уыдоны биографион бæрæггæнæнтæ. Чиныгмæ разныхасы Дзарасаты Сергей фыссы: «Ацы чиныгæй арын, зын хъысмæт чи равзæрста æмæ йыл фæсмон чи нæ кодта, хæстон наудзæуджыты уыцы цардæмбæлтты ном. Уыдон къуыритæ, мæйтæ, азтæ æрвыстой æнæ сæ уарзон нæлгоймæгтæй, хъомыл кодтой сæ сывæллæтты, фыстой нæм диссаджы ныфсæвæрæн фыстæджытæ, былгæрон ныл зæрдиагæй æмбæлдысты æмæ та-иу нæ цыбыр рæстæджы фæстæ ногæй денджызмæ афæндараст кодтой. Æмæ кæд хæстон наудзæуджытæ хицæн кастæ сты, Гæрзифтонг тыхты элитæ, уæд нæ цардæмбæлттæ дæр сты æвæджиау, номхæссæн сылгоймæгтæ. Алы сылгоймаджы бон нæу йæ сæрыхицаумæ бирæ азты дæргъы былгæрон æнхъæлмæ кæсын. Кæй быхсыдысты, иузæрдион кæй уыдысты, уый фæдыл сын нæ сæрæй ныллæг кувæм.
Мæ бинойнаг Зæринæйы номæй арфæ кæнын æппæт денджызонты цардæмбæлттæн дæр, амонд, уарзондзинад æмæ фæрныгадæй хайджын ут, абон дзы не ‘хсæн чи нал ис, уыдон та æнусмæ мысинаг уæнт».
Республикæйы Сæргълæууæг, хæстон-денджызон флоты вице-адмирал Сергей Меняйло чиныгкæсджытæн арфæ ракодта æмæ фæбæрæг кодта, Дзарасаты Сергей стыр куыст кæй бакодта: бирæ рæстæг фæбадт архивты, ссардта хъæугæ æрмæг æмæ йæ зæрдæмæдзæугæ хуызы адæмы размæ рахаста. Ахæм аргъ ма Сергейы фæллойæн скодтой бирæ зындгонд æхсæнадон архайджытæ дæр.
Чиныджы сæ бынат ссардтой 131 адæймаджы. Сергей дарддæр дæр агуырдта иннæты æмæ, чи агура, уый та, куыд зонæм, афтæмæй æнæмæнг ссары. Йæ куысты фæстиуæгæн ацы аз рацыд чиныджы дыккаг тираж, æмæ дзæвгар фæбæзджындæр, ныр йæ номхыгъды ис 210 биографийы. Чи зоны, æмæ уыцы номхыгъд фидæны ноджы фæуæрæхдæр уа… Йæ тираж у 400 экземпляры, аив фæлгонц, хæрзхъæд гæххæттыл уагъд, хуызистытæй – фæлынд.
Дзарасаты Сергейы зæрды ис ахæм чиныг саразын Ирыстоны тæхджытæн дæр, æмæ йын бантысæд!
«Офицеры ВМС – гордость Осетии» цæмæй мыхуыры рацæуа, уымæн хъуыдис дзæвгар æхцайы фæрæзтæ, æмæ ацы ахсджиаг хъуыддаджы Сергейæн ахъаззаг æххуыс бакодтой нæ республикæйы Сæргълæууæг Сергей Иваны фырт Меняйло, Дзæуджыхъæуы администрацийы сæргълæууæг Милдзыхты Эльбрусы фырт Вячеслав, республикæйы раздæры разамонæг Битарты Зелимханы фырт Вячеслав, амалхъом адæймæгтæ Æгъуызарты Æхсарбеджы фырт Руслан, Æгъуызарты Константины фырт Тамерлан, Бататы Таймуразы фырт Феликс, Битарты Шамилы фырт Алик, Битарты Махарбеджы фырт Зелимхан.
Автор сын зæрдиаг арфæ кæны – дыууæ чиныджы рауадзын йæ къухы бафтыд уыдоны æххуысы руаджы, æмæ сын йæ зæрдæ зæгъы стыр цардамонд, фидар æнæниздзинад æмæ фæрныгад.
Телеуынынад «Осетия-Ирыстон»-ы 1 августы, эфиры рацæудзæн чиныгыл ист сæрмагонд равдыст, бацæттæ йæ кодта журналист Рæмонты Ларисæ.
ГАПБАТЫ Алетæ
