Æрвылаз куыд вæййы, афтæ та ныр дæр 23 июлы Хуссар Ирыстоны кадджын уавæры сбæрæг кодтой Информацион фæрæзты кусджыты профессион бæрæгбон. Уый сси традицион, баст у фыццаг ирон мыхуыры фæрæз «Ирон газет»-ы рацыдимæ. Кадджын фембæлд амыдта республикæйы мыхуыры комитеты сæрдар Хъотайты Мария.
Информацион фæрæзты куыстмæ стыр æвæрæн чи бахаста, уыдон хорзæхджын æрцыдысты паддзахадон æмæ мыхуыры комитеты хæрзиуджытæй. Кадджын уавæры сын сæ ратта Хуссар Ирыстоны Президенты хæстæ рæстæгмæ æххæстгæнæг Хъамболты Марат.
Хъамболы-фырт бузныг загъта журналисттæн сæ зын æмæ бæрнон куысты тыххæй. Йæ раныхасы куыд фæнысан кодта, афтæмæй информацион фæрæзтæ æхсæнады ахсынц стыр бынат, æмæ хъуамæ æмгуыст кæной хицауадимæ, ахсджиаг фарстатæ иумæ лыг кæной.
«120 азы размæ рацыд фыццаг мыхуыры фæрæз «Ирон газет». Уæд Ирыстон Цæгат æмæ Хуссарыл дих нæма уыд. Абон дæр нæ архайды сæйраг нысан у дыууæ Ирыстоны баиу кæнын. Мæнмæ гæсгæ, тагъд не стыр бæллиц нæ къухы бафтдзæн. Хæстæгдæр рæстæджы фембæлдзынæн Цæгат Ирыстоны Сæргълæууæг Сергей Меняйлоимæ æмæ баныхас кæндзыстæм культурæйы, аивады,
ахуырады, спорты æнгомдæр æмгуыстады фарстатыл», – загъта Хъамболты Марат.
Кадджын фембæлды рæстæджы информацийы фæрæзты кусджытæ Хъамболы-фыртмæ раттой бирæ фæрстытæ, уыдонимæ – ацы къабазы рæзт æмæ мызд фæфылдæр кæнын, Цæгат Ирыстоны газет рафыссыны кампани сног кæнын æмæ æндæртæ.
Республикæйы Президенты хæстæ рæстæгмæ æххæстгæнæг куыд загъта, афтæмæй уыцы фарстатыл ныридæгæн кусынц, æмæ хæстæгдæр рæстæг фембæлынмæ, бæлвырддæр аныхас кæнынмæ йæхимæ фæхуыдта информацион фæрæзты минæвæртты.
Фембæлды рæстæг Хъамболты Мараты къухæй паддзахадон хæрзиуæг Намысы Орден райста газет «Республикæ»-йы сæйраг редактор Хъоцыты Андрей, майдан «Фæлло-йадон сгуыхтдзинæдты тыххæй» райстой журналист æмæ историк Хъуылымбегты Роберт æмæ газет «Южная Осетия»-йы сæйраг редактор Цыхуырбаты Зæлинæ.
Кадджын ном «Хуссар Ирыстоны сгуыхт журналист» лæвæрд æрцыд газет «Хурзæрин»-ы сæйраг редактор Дамбегты Иринæ æмæ газеты уацхæссæг Цæгат Ирыстоны Джусойты Нинæйæн.
Кадджын грамотæтæ æмæ арфæйы фыстæджытæй ма хорзæхджын æрцыдысты журналисттæ æмæ техникон кусджыты иу къорд.
Кæронбæттæн Хъамболты Марат æрзылди æмæ федта рауагъдады, стæй типографийы бæстыхай, сæ куысты уавæртæ æмæ бирæ лыггæнинаг фарстатæ фæнысан кодта йæхицæн.
Нæ уацхæссæг
