Æнусты дæргъы Хуссар Ирыстоны цы зайæгойтæ рæзы, уыдон лæмбынæгдæр базоныны тыххæй республикæмæ ссыдысты ахуыргæндтæ Мæскуыйæ – Уæрæсейы наукæты академи, Никитскийы ботаникон дыргъдон æмæ Цæгат Ирыстоны паддзахадон университетæй.
Цæгат Ирыстоны паддзахадон университеты биоэкологи æмæ молекулярон-генетикон системæты кафедрæйы кусджытæ мæскуыйаг ахуыргæндтимæ алывæрсыг иртасæн куыстытæ кодтой, Цæгат Кавказы зæххыл цы зайæгойты къордтæ ис, уыдонимæ.
Хуссар Ирыстоны паддзахадон университеты наукон кусджытæ æмæ администрацийы æххуысæй, экспедицийы уæнгтæн æнтыстджын архайдæн уыдис æппæт уавæртæ дæр. Быдырон куыстыты рæстæг специалисттæ сбæлвырд кодтой Ерман æмæ Чъимасдоны кæмтты бæрзонд хæхты экосистемæйы геоботаникон æмæ флористикон хицæндзинæдтæ. Денджызы æмвæзадæй 1500-2500 метры бæрзонддæр бынæттæ басгæрстой. Уæлдайдæр ахуыргæндтæ се ’ргом аздæхтой биологон иртæстытæм. Уырдæм бахаудысты, Кавказæн стыр наукон хæзнайыл нымад чи сты, хъуынайы уыцы хуызтæ.
Ахуыргæндтæ разыйæ баззадысты – сæ къухы бафтыд стыр наукон æрмæг сæмбырд кæнын. Хæстæгдæр фæззæг – зымæджы мæйты сæм каст æрцæудзæн. Цы хатдзæгтæ скæной экспедицийы уæнгтæ сæ архайдæй, уыдон мыхуыргонд æрцæудзысты наукон рауагъды.
ЦИПУ-йы пресс-службæ
