Ацы аз Уæрæсейы Социалон фонды цæгатирыстойнаг хайад регионы бинонтæн иумæйаг пособи бафидынæн радих кодта 11,3 миллиард сомæй фылдæр.
Амынд пособи нæ республикæйы исынц æвддæс азæй кæстæр 73,5 мин сывæллоны æмæ 2,3 мин æнхъæлцау сылгоймаджы. Уæвæн ис, æмæ фæцæрынæн хъæугæ æппæтæй къаддæр хæрдзты бæрцæй 50 проценты, 75 проценты æмæ 100 проценты кæй бæрц уыдзæн, фиддоны бæрц аразгæ у бинонты уыцы æфтиаджы бæрцæй: æнхъæлцау сылгоймæгтæн нымайынц кусынхъом адæмæн фæцæрынæн хъæугæ æппæтæй къаддæр хæрдзты бæрц (Цæгат Ирыстоны – 18579 сомы), сывæллæттæн та – сывæллонæн фæцæрынæн хъæугæ хæрдзты тæккæ къаддæр бæрц (16534 сомы).
УФ-йы граждæнтæ чи сты æмæ иудадзыг Уæрæсейы чи цæры, иумæйаг пособийæн гæххæттытæ саразыны бар ис нæ республикæйы цæрæг ахæм адæймæгтæн. Пособийæн гæххæттытæ аразыны рæстæг пайда кæнынц бинонты æфтиæгтæ æмæ сæ исбонæн иумæйаг аргъкæнынады фæткæй, стæй, ныййарджытæ кусынц æви нæ, науæд æгуыст объективон æфсонæй сты æви нæ, уыдæттæ нымайынц. Фиддоны фæдыл бар цæмæй сæвзæра, уый тыххæй хыгъдон рæстæгмæ (12 мæймæ) кусынхъом бинойнæгты æфтиаджы бæрц хъуамæ уа æппынкъаддæр 8 тæккæ къаддæр мызды бæрцы, ома, 216744 сомы (ацы азы райдайæнæй фæстæмæ тæккæ къаддæр мызды бæрц у 27093 сомы). Бинойнаджы рæстæмбис æфтиаджы бæрц адæймагæн фæцæрынæн хъæугæ тæккæ къаддæр хæрдзты бæрцæй (ома, бинойнагæн – 17045 сомы) фылдæр хъуамæ ма уа.
– Уæ зæрдыл уын лæууын кæнын: июлæй фæстæмæ фиддон æвæрыны ног фæтк архайын райдыдта. Сæйраг ногдзинад бар дары «Нолон æфтиаг»-мæ: нырæй фæстæмæ кусынхъом чи нæу, ахæм адæймагмæ зилыны æууæл мызды цухдзинады ахсджиаг æфсоныл нымад у æрмæст æвдыст хиондзинады заман. Хиуæттыл нымад сты лæг æмæ ус, цот, ныййарджытæ, æфсымæртæ, хотæ, дадатæ, нанатæ æмæ хъæбултæ (цоты цот). Ацы фæтк архайы фыццаг къорды инвалидмæ, æстай азæй хистæр адæймагмæ, науæд та фæкæсинаг зæрондмæ зилыны заман, – зæгъы амынд хайады разамонæг Милдзыхты Аслан.
Адæймагмæ кæй зилынц, ууыл дзурæг гæххæттытæ официалон уагæй саразын хъæуы Социалон фонды. Хиондзинад бавдисынæн курдиатбарвитæджы бахъæудзысты ЗАГС-ы документтæ (райгуырды æмæ къайад саразыны тыххæй æвдисæндартæ). Æфтиаджы цухдзинады ахсджиаг аххосæгтæ хыгъдон заманæй æппынкъаддæр 10 мæйы дæргъы кæд архайдтой, уæд уæвæн ис, æмæ мызд уыдзæн нолон. Кæд амынд рæстæгæй къаддæр, уæд та æппынкъаддæр мызды бæрц нымайынц хайадон уагæй.
Ноджыдæр ма иу ивддзинад бар дары цæрынады бынатмæ цæстдардмæ: адæймаг кæм уыд, ахæм бынæттæм гæсгæ кæй барвыстой, нырæй фæстæмæ цæрынады æууæл бæлвырд кæнынц æппæт ахæм курдиæттæм гæсгæ, регионты фæцæрынæн хъæугæ тæккæ къаддæр хæрдзты хъауджыдзинад нæ нымайгæйæ. Фонд бæрæггæнæнты фылдæр хай сбæлвырд кæндзæн хæдбарæй ведомствæты иумæйаг (куыстдæттæджы, пособийы, пенсийы, цæрæнуатон-коммуналон лæггæдты фæдыл льготæтæ æмæ бирæсывæллонджын бинонты уагæвæрды тыххæй) бафæрстыты фæрцы.
Бæрæггæнæнтæ автоматикон уагæй растыл нымад кæд æрцæуой, уæд документтæ нæ хъæуынц. Æндæр уавæр кæд уа, уæд курдиатбарвитæг адæймагæн бафæдзæхсдзысты цæрæнуат баххуырсыны тыххæй бадзырд, кæнæ сывæллоны скъолайæ, науæд рæвдауæндонæй гæххæтт бавдисын.
Фæрстытæ уæм кæд баззадысты, уæд уын ис 8-800-100-00-01 телефонæй Уæрæсейы Социалон фонды иумæйаг контакт центрмæ лæвар фæудзурыны бар (УФ-йы Социалон фонды цæгатирыстойнаг хайады хызы куысты фæтк: къуырисæрæй цыппæрæммæ – 9:00 сахатæй 18:00 сахаты онг, майрæмбоны та 9:00 сахатæй 16:00 сахаты æмæ 45 минуты онг).
УФ-йы Социалон фонды цæгатирыстойнаг хайады пресс-службæ
