Физикæйы ахуыргæнджыты фæндзæм æппæтуæрæсеон съезд цыдис 27-28 августы, федералон фæзуат «Сириус»-ы. Йæ саразджытæ – ахуырадон фонд «Талант и успех», стæй нæ бæстæйы раззагдæр институттæ æмæ наукон куыстуæттæ – М. Ломоносовы номыл Мæскуыйы паддзахадон университет, наукон иртасæн центр «Курчатовский институт» æмæ иннæтæ.
Съезд æрбамбырд кодта 350 ахуыргæнæджы æмæ эксперты Уæрæсейы 65 регионæй. Иу мин адæймаджы бæрц та онлайн хуызы архайдтой æмæ хъуыстой пленарон сесситæм. Цæгат Ирыстоны номæй съезды архайдтой физикæйы уæлдæр къæпхæны ахуыргæнæг, кадрты рæзт æмæ цæттæкæныны институты хистæр ахуыргæнæг Дзеранты Алетæ, Дзæуджыхъæуы 14- æмæ 44-æм астæуккаг скъолаты физикæйы ахуыргæнджытæ Галина Типличенко æмæ Елена Кузьменко .
Съезд гомгæнгæйæ, йæ архайджытæн зæрдæбын арфæтæ ракодтой ахуырадон фонд «Талант и успех»-ы разамонæг Елена Шмелева, Физикон-техникон институты ректор Дмитрий Ливанов, «Курчатовы институт»-ы ректор Михаил Ковальчук.
– Иууылдæр иумæ – ахуыргæнджытæ, æмкусджытæ, Сириусы къорд бындур æвæрæм физикæйы рæсугъд фидæнæн. Нæ куысты бæрæггæнæнтæ ныридæгæн зынынц. Ивгъуыд аз физикæ чи равзæрста, уыцы рауагъдонты нымæц 24 проценты уыд фылдæр. Уый дзурæг у физикæмæ цымыдисдзинадыл, – загъта Елена Шмелева.
Технологиты æнæрлæугæ рæзты уавæрты физикæйы уроктæм дæр нырыккон домæнтæ хъуамæ уа, ацы æмæ æндæр ахсджиаг фарстатæ рæгъмæ рахастой пленарон æмбырдтæ, тематикон секцитæ æмæ мастер-къласты рæстæг. Ныхас цыд скъолаты эксперименттыл, олимпиадæты архайыныл. Хорзыл банымадтой, бæрзонд технологитимæ куыстуæттæ, институттæ æмæ скъолаты æмгуыстад дæр.
Физикæйы ахуыргæнджыты æппæтуæрæсеон съезды архайдæй, фыццаджыдæр, райстам ног зонындзинæдтæ не ‘мкусджыты фæлтæрддзинадæй хайджын фестæм, ахуырадон стандартты цы вазыгджын ивддзинæдтæ æрцыд, уыдоныл дзырдтам. Нæ бæстæйы физикон ахуырады рæзтæн цы гæнæнтæ ис, уый тыххæй нæ хъуыдытæ, нæ фиппаинæгтæ загътам.
«Сириус»-ы цы фæлтæрддзинад, цы ног зонындзинæдтæ райстам, уыдоны бындурыл бацæттæ кæндзыстæм сæрмагонд программæ Цæгат Ирыстоны физикæйы ахуыргæнджыты методикон семинартæн.
Съезды уынаффæтæй спайда кæндзысты паддзахадон ахуырадон политикæйы дарддæры рæзтæн.
Дзеранты Алетæ, педагогон наукæты кандидат, Дзæуджыхъæуы 18-æм астæуккаг скъолайы физикæйы ахуыргæнæг
