Дзæуджыхъæуы кадджын уавæры байгом кодтой Рог атлетикæйы æппæтуæрæсеон федерацийы фыццаг згъорыны фыццаг лæвар центр. Архайдта дзы РЦИ-Аланийы Сæргълæууæг Сергей Меняйло. Уазджыты ’хсæн уыдысты – Рог атлетикæйы æппæтуæрæсеон федерацийы сæрдар Петр Фрадков, УФ-йы Паддзахадон Думæйы депутат, автономон æнæкоммерцион организаци «Евразия»-йы Координацион советы сæрдар Алена Аршинова.
Уазджытæн æгасцуай зæгъгæйæ, Сергей Меняйло фæбæрæг кодта, ахæм объекты фæзынд ахсджиаг къахдзæф кæй у республикæйы дзыллон спорты рæзтæн:
– Бузныг зæгъын Рог атлетикæйы æппæтуæрæсеон федерацийæн, автономон æнæкоммерцион организаци «Евразия»-йæн æмæ, центр саразыныл чи архайдта, уыдонæн се ’ппæтæн дæр. Уый æцæг лæвар у нæ республикæйы цæрджытæн æмæ стыр бавæрæн дзыллон спорты рæзтмæ. Махæн уæлдай ахсджиагдæр у, алкæй бон дæр дзы кæй у архайын: уый хицæн адæймаджы объект нæу, фæлæ нырыккон æхсæнадон фæзуат Терчы доны былгæрон. Мæн уырны, ацы рæсугъд центр нæ республикæйы цæрджытæ æмæ уазджыты ‘рдæм кæй æмбырд кæндзæн æмæ сæ разæнгард кæй кæндзæн спорты архайынмæ.
Петр Фрадков куыд загъта, афтæмæй ахæм егъау инфраструктурон проекты сæйраг нысан у – рог атлетикæ æгас дзыллæтæн дæр æнцонвадат скæнын. Рог атлетикæйы æппæтуæрæсеон федерацийы згъорæн центр Уæрæсейы у фыццаг. 2036 азмæ рог атлетикæйы ахæм центртæ ма фæзындзысты нæ бæстæйы 23 горæты.
– Проект æххæстгæнгæйæ, мах хъуыды кодтам, ахæм центр йæ фыццаг бонæй ахсджиагдæр кæм бахъæудзæн, ууыл, ома, активон згъорæг æхсæнад, тренировкæтæ кæнæн бынат, цæрджыты фæндон æмæ регионалон командæйы цæттæдзинад кæм уа. Æппæт уыцы домæнтæм гæсгæ равзæрстам Дзæуджыхъæу, – загъта Петр Фрадков.
Проект арæзт æрцыд автономон æнæкоммерцион организаци «Евразия»-йы æххуысæй. Уый стыр ахъаз у, социалон ахадындзинад кæмæн ис, ахæм хъæппæристæ ахуырад, медицинæ, культурæ, хæрзаудæндзинад æмæ спорты аразынæн.
– Мах разы стæм, УФ-йы Президент Владимир Путин нæ размæ цы хæстæ æмæ фарстатæ æвæры, уыдонимæ. Уымæ гæсгæ нын ахсджиаг уыд Рог атлетикæйы федерацийы хъæппæрисæн баххуыс кæнын. Æхсызгон мын у, Рог атлетикæйы æппæтуæрæсеон федераци, ацы хъуыддаг æхсызгонæй арæзт кæм æрцæудзæн, ахæм 23 регионы кæй сбæрæг кодта. Уыдонæй фыццагдæр йæ къухы кæмæн бантыст, уый у Цæгат Ирыстон, – бахахх кодта Алена Аршинова.
Сергей Меняйло æмæ уазджытæ фидæны згъорæг фæлтæртæн сæвæрдтой рæстæджы капсулæ ныстуанимæ. Уый фæстæ мадзалы архайджытæ старт раттой бинонты азгъордæн. Сергей Меняйло базонгæ центры куыстимæ. Ам ис хи найæн æмæ дзаумæттæ ивæн кабинкæтæ, сæрмагонд зал тренировкæтæ кæнынæн. Хæрзвадат æмæ æдас архайдæн згъорæн фæндæгтæ æмбæрзт сты резинæйæ. Йæ алыварс фæзуаты ис фæлладуадзæн бынæттæ бинонтæн.
ХЪОЙБАЙТЫ Галинæ
