Цыколайы районы Культурæйы галуаны æрцыд æхсызгон цау – Æрæфы районы цæрджытæн йæ аивадæй сæ зæрдæ барухс кодта Зард æмæ кафты паддзахадон академион сгуыхт ансамбль «Донбасс». Зæгъын æмбæлы, уый уыд историон фембæлд.
«Донбасс» – таурæгъон коллектив, йæ истори райдыдта 1937 азы горæт Сталинойы (ныры Донецк). Арæзт уыд, куыд Шахтерты зард æмæ кафты ансамбль, æмæ йæ хъысмæт æнгом баст уыд нæ бæстæйы хъысмæтимæ. Фыдыбæстæйы Стыр хæсты заман коллектив ратта 900 концертæй фылдæр советон хæстонтæн, тохæй тохы ‘хсæн, зындзинæдтæ ницæмæ даргæйæ. Абон уый у, дунейы хъуыстгонд чи у, ахæм академион коллектив, йæ программæ «Бирæнацион Донбасс» та сси адæмты хæлардзинады гимн.
Нæ куырыхон фыдæлты æгъдаумæ гæсгæ уазджытыл кадджын уавæры сæмбæлдысты – сæ размæ сын рахастой ирон адæмы уазæгуарзондзинады сакралон символтæ – æртæ чъирийы æмæ бæгæныйы кæхц. Зæрдиаг æгасцуай æмæ арфæйы ныхæстæ сын загътой – Æрæфы районы администрацийы сæргълæууæджы хæдивæг Гогаты Аслæнбег æмæ районы Культурæйы галуаны директоры хæдивæг Махъоты Алыксандр. «Донбасс»-ы артистты размæ рацыд æмæ сыл зæрдиагæй баузæлыд Культурæйы галуаны æппæт коллектив, йæ сæргъы районы культурæйы управленийы хицау Хадаты Марик æмæ галуаны директор Елджарты Станислав, афтæмæй.
«Донбасс» цы концерт ратта Æрæфы районы цæрджытæн, уый æмбисондæн дзуринаг у. Кафт æмæ зард кæрæдзийы ивтой – лирикон, зæрдæагайгæ, ритмикон… Залы бадджытæ сын аргъ кодтой тыхджын къухæмдзæгъдæй, æхсызгон хъæртæй. Афтæмæй бæрзонд аивад æппæт арæнты сæрты ахызт æмæ ‘рбангом кодта адæмы.
Кадджын уазджытæн, кæй зæгъын æй хъæуы, районы кæрдзындæттон цæрджытæ сарæзтой рæсугъд бæрæгбоны фынг. Фысымтæ æмæ уазджытæ дзырдтой сабырдзинад æмæ хæлардзинадыл, цыфæнды уæззау рæстæг дæр адæмы зæрдæтæ чи барухс кæны æмæ батавы, аивады уыцы æвидигæ тыхыл.
Дызæрдыггаг нæу, Цыколайы цæрджытæ «Донбасс»-ы аивадæн аккаг аргъ кæй скодтой æмæ йæ кæй мысдзысты бирæ рæстæг. Уазæг артисттæ та семæ аластой уазæгуарзон, рæдау Ирыстоны хъармæй хай.
ГАПБАТЫ Алетæ
