Ацы бонты Дзæуджыхъæуы гастрольты ис Новгороды Достоевскийы номыл академион драмон театр, йæ аивадон разамонæг – не ‘мзæххон, Дур-Дурæй рацæуæг МУРИТЫ Алыксандр.
28-31 октябрмæ ирыстойнаг театрдзауты зонгæ кæндзæн театры хуыздæр спектакльтимæ, сты авд: аргъау «Умка», ретро-комеди «В джазе только девушки», блокбастер «Осужденные», замоскворецкаг анекдот «Не все коту масленица», Юрий Еремины пьесæмæ гæсгæ спектакль «Идиот», æбуалгъ истори «Собачье сердце» æмæ театралон фарс «Кукла наследника Тутти». Гастрольты фыццаг бон Вахтанговы номыл Уырыссаг академион театры уый фембæлд республикæйы журналисттимæ.
Муриты бинонты кæстæр Алыксандр йæ гыццылæй фæстæмæ бæллыд театры кусынмæ, ныййарджытæ та йæм æндæр цæмæдæрмæ ‘нхъæлмæ кастысты. Сæ хъыджы бацæуын æй нæ фæндыд, æмæ ахуыр кæнынмæ бацыд журналистикæйы факультетмæ, дыккæгæм курсы раивта Мæскуымæ. Ахуыргæнгæйæ дæр, йæ бæллицыл не сивта йæ зæрдæ, æппынфæстаг бацыд Щукины номыл Театралон институты режиссурæйы факультетмæ. Ахуыр та кодта хъуыстгонд театралон режиссер, Уæрæсейы адæмон артист Юрий Ереминмæ. Алыксандрыл йæ цæст æрæвæрдта æмæ йæ йемæ репетицитæм хонын райдыдта. Уым курдиатджын лæппу зонгæ кодта, театры дæсны спектакльтæ куыд æвæры, уыимæ. Новгороды театрæй йæм куы бахатыдысты, кусынмæ рацу, зæгъгæ, уæд дæр фыццаг йæ ахуыргæнæгмæ бадзырдта телефонæй, разыйы дзуапп дзы куы фехъуыста, уæд Новгороды театры режиссерæй кусынмæ ацыд.
Уырдæм ныццæугæйæ, цæуыл дис кодта Алыксандр, уый – театры труппæ! Куыд курдиатджын сты иууылдæр, раст цыма се ‘ппæт дæр цыдæр егъау театралон куыст сæххæст кæнынмæ ‘нхъæлмæ кастысты, афтæ йæм зынд. Мурийы-фырт Новгороды театры кæд бирæ рæстæг нæ кусы, уæддæр тырны йе сфæлдыстадон хъуыдытæ æмæ фæндтæ дзы рæсугъдæй æххæст кæнынмæ. Ацы бонты Федор Достоевскийы номыл театралон труппæимæ гастрольты ис йæ райгуырæн Ирыстоны зæххыл:
– Махæн уæлдай ахсджиаг у классикон театры традицитæм раздæхын, уый театрдзаутæ уарзынц актерты цардæгас хъазты, психологион арф хъуыды æмæ авторы дзырдæн аргъ кæныны тыххæй. Фылдæр æргом здахæм уырыссаг классикæмæ: фыццагау дзы ахсджиаг фарстатыл цæуы ныхас, адæймаджы тыхсын кæнынц, рæстæг æмæ бынат нæ хынцгæйæ. Æхсызгон нын у, программæ «Большие гастроли» нын фадат кæй дæтты нæ спектакльтимæ Новгороды облæсты алфамбылай регионты театрдзауты дæр базонгæ кæнын, абон цæуыл кусæм, уый сын равдисын. Махæн нæ балц канд гастрольтæ не сты, фæлæ ма Дзæуджыхъæуы театрдзаутимæ ахсджиаг сфæлдыстадон ныхас дæр, – загъта Муриты Алыксандр.
Сæдæ æвдай æртæ азы кæуыл цæуы, уыцы театр уал азы дæргъы адæмы размæ хæссы уырыссаг æмæ дунеон классикæйы уацмыстæ, нырыккон драматурги æмæ сценикон аивады алыхуызон формæтæ. Нæ рæстæджы дарддæр дæр хæццæ кæны психологион театры традицитæ, æргом здахы актерты куыстмæ, драматургион æрмæджы арфдзинадмæ æмæ классикон уацмысты нырыккон уынынадмæ. Гастролон программæйы сты алыхуызон жанртæ, комеди æмæ аргъауæй райдай æмæ психологион драмæ æмæ сатирикон фантастикæйæ фæу.
ХУЫБИАТЫ Ларисæ,
авторы ист къамтæ
